ગ્રામ પંચાયતના વહીવટનું કરેલું પ્રત્યક્ષ નિરીક્ષણ અને લાયબ્રેરી નિહાળી ખુશ થયેલા વિદ્યાર્થીઓ
(વર્તમાન પ્રવાહ ન્યુઝ નેટવર્ક)
દમણ, તા.19
દમણ જિલ્લા પંચાયત સંચાલિત સરકારી ઉચ્ચ પ્રાથમિક શાળા પરિયારીના વિદ્યાર્થીઓએ પરિયારી ગ્રામ પંચાયત અને આયુષ્માન ભારત હેલ્થ એન્ડ વેલનેસ સેન્ટરની મુલાકાત લીધી હતી.
પરિયારીની ઉચ્ચ પ્રાથમિક શાળાના વિદ્યાર્થીઓએ ગ્રામ પંચાયત દ્વારા થતા વહીવટની પ્રત્યક્ષ જાણકારી મેળવી હતી. આ પ્રસંગે સરપંચ શ્રીમતી પંક્તિબેન પટેલ, પંચાયતના સેક્રેટરી શ્રી ઓમપ્રકાશ યાદવ તથા પંચાયતના એકાઉન્ટન્ટ શ્રી સુરેશભાઈ માહ્યાવંશીએ પંચાયતના વહીવટની જાણકારી આપી હતી.
વિદ્યાર્થીઓએ પરિયારી ખાતે આવેલ આયુષ્માન ભારત હેલ્થ એન્ડ વેલનેસ સેન્ટરની પણ મુલાકાત લીધી હતી અને ગ્રામ્ય સ્તરે મળતી પ્રાથમિક આરોગ્ય સેવાથી આયુષ્માન ભારત હેલ્થ એન્ડ વેલનેસ સેન્ટર પરિયારીના કોમ્યુનિટી હેલ્થ ઓફિસર સુશ્રી અમૃતા કૌરે માહિતગાર કર્યા હતા.
આ પ્રસંગે પરિયારી ઉચ્ચ પ્રાથમિક શાળાના ઈન્ચાર્જ આચાર્ય શ્રી અરવિંદભાઈ સુમરાના દિશા-નિર્દેશ હેઠળ શ્રીમતી પુષ્પાબેન રાઠોડ, શ્રીમતી ડિમ્પલબેન પટેલ અને શ્રીમતી તેજલબેન માહ્યાવંશી શાળા વિદ્યાર્થીઓ સાથે જોડાયા હતા.
