(વર્તમાન પ્રવાહ ન્યુઝ નેટવર્ક)
સેલવાસ,તા.25: સેલવાસના દયાત ફળિયા વિસ્તારમાં રહેતા એક યુવાનને દારૂના પૈસા ચુકવવાના ઝઘડામાં મારામારી કરી પુલ પરથી ધક્કો મારી મારી નાંખવાના પ્રયાસમાં ગંભીરઈજા થતાં હોસ્પિટલમાં સારવાર અર્થે દાખલ કરવામાં આવ્યો હતો, જેની હત્યાના પ્રયાસમાં એક આરોપીની ધરપકડ કરવામાં આવી છે.
પ્રાપ્ત વિગત અનુસાર ગત ગત 21 ડિસેમ્બર, 2022ના રોજ ઘાયલ વ્યક્તિ વિજય કુમાર રાજેશરામ (ઉ.વ.22ર) હેવાસી દયાત ફળિયા, સેલવાસ જે પ્રિસીજન વાયર કંપનીમાં છૂટકમજુર તરીકે નોકરી કરે છે અને એની મુલાકાત આરોપી વ્યક્તિ વિજય ઉર્ફે ધનજીત મુનીલાલ સિંહ (ઉ.વ.30) રહેવાસી લવાછા, ખાડી ફળિયા જેની સાથે થઈ હતી. આ બન્ને જણ બિયર પીધા બાદ પૈસા ચૂકવવા અંગે વિવાદ થતા ઝગડો શરૂ થઈ ગયો હતો અને વિજય ઉર્ફે ધનજીતે વિજય કુમાર રાજેશરામને મારવાના ઈરાદાથી પુલ પરથી ધક્કો મારી દીધો હતો જેના કારણે વિજય રાજેશરામ નીચે પડયો હતો અને એના પાંસળીનુ હાડકું, પેટ અને શરીર પર ગંભીર ઈજાઓ થઈ હતી. જેને સારવાર અર્થે સિવિલ હોસ્પિટલમાં દાખલ કરવામા આવ્યો હતો. જેની ફરિયાદના આધારે સેલવાસ પોલીસે આઈપીસી કલમ 307 મુજબ ગુનો નોંધી વધુ તપાસ પીએસઆઈ શ્રી સોનુ દુબે કરી રહ્યા હતા. ગુનાની ગંભીરતાને જોતા એસ.એચ.ઓ. શ્રી અનિલ ટી.કે.ના નેતૃત્વમાં એક ટીમ બનાવી આરોપી વિજય ઉર્ફે ધનજીતને શોધી 22ડિસેમ્બરના રોજ ધરપકડ કરવામાં આવી હતી. આરોપીને પોલીસે કસ્ટડીમાં મોકલી આપ્યો છે. આ ઘટનાની વધુ તપાસસેલવાસ પોલીસ કરી રહી છે.
