પ્રિમિયર લીગ-2023ની મેચોમાં વિવિધ 16 ટીમો જોડાઈ : એસ.પી. ડો.ઝાલાના હસ્તે શુભારંભ
(વર્તમાન પ્રવાહ વાપી બ્યુરો)
વાપી, તા.03: વાપી ટ્રાન્સપોર્ટ એસોસિએશન દ્વારા વી.આઈ.એ. ગ્રાઉન્ડમાં આજથી ત્રિદિવસીય ટ્રાન્સપોર્ટ પ્રિમિયર લીગ-6નો પ્રારંભથયો છે. જેમાં જિલ્લાની વિવિધ 16 ટીમો વચ્ચે રસાકસીભરી ક્રિકેટ મેચો રમાશે.
વાપી સહિત વલસાડ જિલ્લામાં 2 હજાર ઉપરાંત ટ્રાન્સપોર્ટરો છે. આ વ્યવસાય સાથે સંકળાયેલ ટ્રાન્સપોર્ટર, કર્મચારીઓ એકબીજા સાથે સંકળાય વેપાર-ધંધામાં વૃધ્ધિ થાય તેવા સુચારુ હેતુસર વાપી ટ્રાન્સપોર્ટ એસોસિએશન છેલ્લા 6 વર્ષથી વી.ટી.એ. પ્રિમિયર લીગનું આયોજન કરે છે. આ વર્ષે વી.ટી.એ.ની છઠ્ઠી-2023 લીગનો આજે મંગળવારે વી.આઈ.એ. ગ્રાઉન્ડમાં આરંભ થયો હતો. જેમાં વિવિધ 16 ટીમના 232 ખેલાડીઓ જોડાયા છે. આ પ્રિમિયર લીગનો શુભારંભ સમારોહ વી.આઈ.એ. હોલમાં યોજાયો હતો. જેનુ ઉદ્દઘાટન જિલ્લા પોલીસ વડા ડો.ઝાલાના હસ્તે થયું હતું. સમારંભમાં વી.ટી.એ.ના પૂર્વ પ્રમુખ અરવિંદભાઈ શાહ, રામસિંહ સારજા, વર્તમાન પ્રમુખ ભરતભાઈ ઠક્કર, વી.આઈ.એ. પ્રમુખ કમલેશભાઈ પટેલ સહિત અગ્રણી ટ્રાન્સપોર્ટ વ્યવસાયી, વેપારી ઉપસ્થિત રહ્યા હતા. અંતિમ ત્રીજા દિવસે સેમિફાઈનલ, ફાઈનલ મેચ યોજાશે જેમાં ખેલાડીઓને વિજેતા ટીમોને ઈનામો વિતરણ કરાશે.
