(વર્તમાન પ્રવાહ ન્યુઝ નેટવર્ક)
દમણ, તા.19: દાભેલ ખાતે આવેલી સરકારી પ્રાથમિક શાળામાં ગત 16મી જાન્યુઆરીના રોજ શાળાના શિક્ષક શ્રી કિરીટભાઈની પ્રેરણા અને માર્ગદર્શન હેઠળ ‘નશામુક્ત ભારત’ અભિયાન અંતર્ગત પોસ્ટર બનાવવા માટેની સ્પર્ધાનું આયોજન કરવામાં આવ્યું હતું. આ પોસ્ટર બનાવવાની સ્પર્ધામાં શાળાના તમામ વિદ્યાર્થીઓએ ઉત્સાહથી ભાગ લીધો હતો.
અત્રે યાદ રહે કે, ભારતમાં દર વર્ષે વિવિધ પ્રકારના નશા કરવાના કારણે કેટલાક પરિવાર બરબાદ થઈ જાય છે. નશામાં કેટલીય દુર્ઘટનાઓ સર્જાય છે. એવામાં ‘નશામુક્ત ભારત’ અભિયાનને સમગ્ર ભારત દેશમાં ચલાવવા માટેની એક અપીલ કરવામાં આવી છે.
દાભેલની સરકારી પ્રાથમિક શાળામાં યોજાયેલ પોસ્ટર બનાવવાની સ્પર્ધામાં વિદ્યાર્થીઓએ પ્રેરણારૂપ પોસ્ટરો બનાવ્યા હતા. આ ‘નશામુક્ત ભારત’ અભિયાન અંતર્ગત પોસ્ટર સ્પર્ધામાં તમામ વિદ્યાર્થીઓને શાળાના શિક્ષકોએ સંપૂર્ણ સહયોગ પુરો પાડયો હતો અને તેઓનો હોંશલો બુલંદ કર્યો હતો.
સમગ્ર સ્પર્ધાને સફળ બનાવવા માટે શાળાના આચાર્યા શ્રીમતી ઈન્દિરાબેનના માર્ગદર્શનમાં શિક્ષકો શ્રીમતી ભારતીબેન, શ્રી જગદીશભાઈ, શ્રીમતી બિનાબેન, શ્રીમતી જોશનાબેનનો પણમહત્ત્વનો સહયોગ મળ્યો હતો.
