(વર્તમાન પ્રવાહ ન્યુઝ નેટવર્ક)
ચીખલી(વંકાલ), તા.06: ચીખલી તાલુકામાં ગામેગામ પરવાનગી વિના ચિકન-મટનની દુકાન, ઢાબાઓ ધમધમી રહ્યા છે. ત્યારે રાજ્યની વડી અદાલતની ફટકાર બાદ ફૂડ અને ડ્રગ વિભાગ દ્વારા લાલ આંખ કરવામાં આવે તે જરૂરી છે.
ચીખલીમાં નેશનલ હાઈવેની આજુબાજુમાં ઉપરાંત ગામેગામ ગેરકાયદેસર રીતે અનેક ચિકન અને મટનની દુકાનો ધમધમી રહી છે કેટલીક જગ્યાએ તો ધાર્મિક અને શૈક્ષણિક સંસ્થાની નજીક પણ આ પ્રકારની દુકાનો ધમધમતા ગંદકી પણ ફેલાઈ રહી છે. ચિકન-મટનની દુકાન ઢાબા ચલાવનારાઓ દ્વારા પિછડાઓ તથા અન્ય ખરાબ ભાગ ગમે ત્યાં ફેંકી દેવામાં આવે છે. જેને પગલે તીવ્ર દુર્ગંધ સાથે ગંદકી પણ ફેલાતી હોય છે.
તાલુકામાં ગણ્યા ગાંઠિયા લોકો દ્વારા ચિકન મટનની દુકાન-ઢાબા માટે પરવાનગી લેવામાં આવતી હોય છે. મોટે ભાગની ચિકન મટનની દુકાનો અને ઢાબાઓ પરવાનગી વિના જ ધમધમતા હોય છે. ખાસ કરીને સાંજ પડતા અને રજાના દિવસોમાં વાર તહેવારમાં તો કેટલાક ચિકન મટનની દુકાનો અને ઢાબાઓ પર ભીડ જામતી હોય છે. આ દુકાનો ઢાબાઓ સાફ સફાઈ સહિતની તકેદારી પણ ન રાખી નીતિ નિયમ વિરૂધ્ધ મનમાનીથી જચલાવતા હોય છે.
રાજ્યની વડી અદાલતની લપડાક બાદ પણ તાલુકામાં હજુ ખાસ કરીને ગ્રામ્ય વિસ્તારમાં પરવાનગી વિનાનો ચિકન મટનની દુકાનો અને ઢાબાઓ ધમધમી રહ્યા છે. તેમાં ફૂડ એન્ડ ડ્રગ વિભાગ દ્વારા પૂરતી કાર્યવાહી કરવામાં આવી હોય તેમ જણાતું નથી ત્યારે વડી અદાલતની ફટકાર બાદ ફૂડ એન્ડ ડ્રગ વિભાગ અને આરોગ્ય વિભાગ જાગે અને પરવાનગી વિના ચિકન મટનની દુકાન અને ઢાબાઓ ચલાવનારાઓ સામે કાયદેસરની કાર્યવાહી કરવામાં આવે તે જરૂરી છે.
આ કાર્યવાહી અંગે જિલ્લાના ફૂડ એન્ડ ડ્રગ વિભાગના દિલીપભાઈ નાયકનો સંપર્ક કરતા તેમને ફોન રિસીવ ન કરતા હકીકત જાણી શકાય ન હતી.