સુરતથી વલસાડ મેડીકલ કોલેજમાં કાર લઈ જઈ રહેલા પ્રોફેસરનો ચમત્કારિક બચાવ
(વર્તમાન પ્રવાહ વાપી બ્યુરો)
વાપી, તા.10: વલસાડ હાઈવે ગુંદલાવ પાસે સુરત તરફ જઈ રહેલ કન્ટેનર ચાલકે એકાએક કાબુ ગુમાવતા કન્ટેનર ડિવાઈડર કુદી સામેની ટ્રેક આવી રહેલી કાર ઉપર પલ્ટી મારી ગયું હતું. દિલધડક સર્જાયેલા અકસ્માતમાં કન્ટેનર નીચે કાર છુંદાઈ ગઈ હતી પરંતુ કાર ચાલક પ્રોફેસરનો ચમત્કારિક બચાવ થયો હતો.
વલસાડ ગુંદલાવ હાઈવે ઉપર આજે શુક્રવારે બપોરે વાપી તરફથી આવી રહેલ કન્ટેનર નં.એમએચ 46 એચ 4753ના ચાલક અજય મહાદેવ ઓડએ સ્ટીયરીંગ ઉપરથી કાબુ ગુમાવતા કન્ટેનર નવસારી તરફથી આવતી લાઈન ઉપર ડિવાઈડર કુદી પલ્ટી મારી ગયું હતું. પરંતુ ત્યારે સુરતથી કાર લઈને વલસાડ મેડિકલ કોલેજમાં જઈ રહેલા પ્રોફેસરની કાર ઉપર કન્ટેનર ખાબકતા કારનો કચ્ચરઘામ વળી છુંદો થઈ ગયો હતો. પરંતુ સનાતન યુક્તિ છે કે ‘‘જા કો રાખે સાંઈયા માર ના શકે કોઈ” કંઈક તેવી જ ક્ષણ ઉદ્ભવી હતી. કારની એરબેગ ખુલી જતા પ્રોફેસરનો હેમકેમચમત્કારિક બચાવ થયો હતો. અકસ્માત બાદ પોલીસ અને એમ્બ્યુલન્સે કાર અને કન્ટેનર ચાલકોને સિવિલમાં સારવાર અર્થે ખસેડયા હતા. લોકો અજીબ અકસ્માત જોઈ વિસ્મયમાં પડી ચૂક્યા હતા.