માંગણીઓ નહી સંતોષાય તો જિલ્લામાં આરોગ્ય સેવા ઠપ્પ કરવાની ચીમકી ઉચ્ચારી
(વર્તમાન પ્રવાહ વાપી બ્યુરો)
વાપી, તા.13: વલસાડ જિલ્લાના આરોગ્ય કર્મચારી મંડળ લાંબા સમયથી પડતર પ્રશ્નોના ઉકેલ માટે લડત ચલાવી રહેલ છે પરંતુ કોઈ પ્રતિભાવ નહી મળતા આજે આરોગ્ય કર્મચારી મંડળના હોદ્દેદારો, જિલ્લા પંચાયત પ્રમુખ અને ડી.ડી.ઓ.ને મળી આવેદનપત્ર પાઠવ્યું હતું.
વલસાડ જિલ્લા આરોગ્ય કર્મચારી મંડળના પ્રમુખ કેતનભાઈ પટેલ, મંત્રી રાયલુભાઈ ગાંવિત અને હોદ્દેદારો આજે વલસાડ જિલ્લા પંચાયતના પ્રમુખ અલકાબેન શાહ તથા ડી.ડી.ઓ.ને મળી આરોગ્યકર્મચારીઓની પડતર સમસ્યા અને પ્રશ્નોનો ઉકેલ લાવવાની રજૂઆત કરી આવેદનપત્ર સુપરત કર્યુ હતું. ગત તા.18 જાન્યુઆરીએ સમાધાન કરેલ. ઉકેલ લાવવાની મહેનત આપેલ તેનો અમલ આજદિન સુધી થયેલ નથી તેથી આરોગ્ય વિભાગના કર્મચારીઓની માંગણી સંતોષાય નહી તો આગામી સમયે જિલ્લા પંચાયત સંચાલીત તમામ આરોગ્ય સેવાઓ ઠપ્પ કરવાની આરોગ્ય કર્મચારી મંડળે ચીમકી ઉચ્ચારી હતી.