જીઆરડી જવાનો અને સહેલાણીઓએ વૃધ્ધને બચાવી સારવારમાં ખસેડયો
(વર્તમાન પ્રવાહ વાપી બ્યુરો)
વાપી, તા.11: જીવનની ઢળતી ઉંમરે ના જાણે શું મુસિબત આવી હશે કે વલસાડ તિથલ બીચ ઉપર વૃધ્ધે દરિયામાં ઝંપલાવી આપઘાતની કોશિષ કરી હતી. ઘટના આજે મંગળવારે બપોરે તિથલના દરિયા કાંઠે ઘટી હતી. આશરે 60 વર્ષિય અજાણ્યા વૃધ્ધે દરિયામાં આપઘાત કરવાની કરેલી કોશિષ બાદ સહેલાણીઓ અને જી.આર.ડી.ના જવાનોનું એકાએક ધ્યાન જતા વૃધ્ધને ઉગારીને 108 એમ્બ્યુલન્સ દ્વારા સિવિલમાં સારવાર માટે ખસેડયો હતો.
આજે મંગળવારે બપોરે તિથલ દરિયા કિનારે એક અજાણ્યા વૃધ્ધે પહેરેલા કપડે દરિયામાં મોતની છલાંગ લગાવી દીધી હતી. સ્થાનિક ફેરીયા અને સહેલાણીઓનું ધ્યાન જતા જી.આર.ડી. જવાનો સહિત બધા દોડી ગયા હતા અને વૃધ્ધને હેમખેમ બહાર કાઢી 108 દ્વારા સિવિલમાં સારવાર માટે ખસેડયા હતા. સી.ટી. પોલીસે વૃધ્ધને ઓળખ કરવાની વધુ તપાસ હાથ ધરી છે.