એક્સાઈઝની પરમીટ સાથે બિયરનો જથ્થો ભરી નીકળેલી ટ્રકનો ચાલક ટ્રક છોડી ફરાર
(વર્તમાન પ્રવાહ ન્યુઝ નેટવર્ક)
પારડી, તા.04: પારડી નેશનલ હાઈવે નંબર 48 પરથી શુક્રવારના સાંજે સુરત તરફ જતી ક્વિડ કાર નંબરજીજે-21-બીસી-1936ને પારડી પ્રિન્સેસ પાર્ક સામે ટ્રક નંબર એમએચ-18-બીજી-0404 એ જોરદાર ટક્કર મારતા કાર હાઈવે ગ્રીલમાં જોરદાર ભટકાઈ હતી અને હાઈવેની લોખંડની ગ્રીલ તોડી કાર સર્વિસ રોડ કૂદાવી પ્રિન્સેસ પાર્ક આગળથી પસાર થતાં સર્વિસ રોડ પર ધસી અટકી ગઈ હતી. જોકે આ અકસ્માત સમયે જ સર્વિસ રોડથી જતી મોપેડ પણ માંડ માંડ અડફેટમાં આવતા બચી હતી. જોકે કારને અકસ્માતમાં ભારે નુકશાન પહોંચ્યું હતું અને તેમાં સવાર ભાવેશભાઈ બાલુભાઈ પટેલ રહે.બીલીમોરા દેશરા તેમજ તેમના પરિવારના પાંચ સભ્યોનો બચાવ થયો હતો. જોકે અકસ્માત બાદ ટ્રક ચાલક ઘટના સ્થળે ટ્રક મૂકી ફરાર થઈ ગયો હતો. જોકે આ ટ્રકમાં બીયરનો જથ્થો ભર્યો હોવાનું બહાર આવ્યું હતું પરંતુ જે ટ્રક એક્સાઈઝની પરમીટ સાથે નીકળી હોવાની પણ વિગતો બહાર આવી હતી. ટ્રકમાં દારૂનો જથ્થો પરમીટ સાથે નીકળતો હોય ત્યારે નિયમ મુજબ પોલીસ એસ્કોર્ટ પણ કરતી હોય છે. ત્યારે અકસ્માત બાદ ટ્રક ચાલક ટ્રક છોડી ફરાર થયો હતો અને એસ્કોર્ટ કરતી પોલીસ પણ ઘટના સ્થળે જોવા ન મળતા અનેક પ્રશ્નાર્થ ઉભા થવા પામ્યા હતા. જોકે કાર સવારો પારડી પોલીસ મથકે ફરિયાદ કરવા પહોંચતા બીયર ભરેલી ટ્રકનો એસ્કોર્ટ કરતી પોલીસ પણ મોડે મોડે પહોંચી હતી. અને પોલીસ મથકે પરમિટનોબિયરનો જથ્થો હોવાના કાગડિયાઓ રજૂ કર્યા હતા.