ધરમપુર ચોકડી ઉપર 10 વાહન ચાલકોને લેઝર સ્પીડ ગનની મદદથી ઈ મેમો ફટકાર્યા
(વર્તમાન પ્રવાહ વાપી બ્યુરો)
વાપી, તા.30: રાજ્યમાં નેશનલ અને સ્ટેટ હાઈવે ઉપર વાહનો ઓવર સ્પીડથી હંકારાઈ રહ્યા છે. તેથી બેકાબુ થતા વાહનો વારંવાર અકસ્માત સર્જાતા હોય છે. તેવા અકસ્માતો અટકાવવા માટે રાજ્ય પોલીસે નવતર પ્રયોગ શરૂ કરી દીધો છે. હાઈવે ઉપર ટ્રાફિક પોલીસ લેઝર સ્પીડ ગનથી વાહનોની ગતિ કન્ટ્રોલ કરશે. તેનો પ્રારંભ વલસાડ જિલ્લા ટ્રાફિક પોલીસે શરૂ કરી દીધો છે. વધુ સ્પીડમાં દોડતા વાહનોને કન્ટ્રોલ પણ કરાશે અને ઈ-મેમો પણ પકડાવી દેવાશે.
વલસાડ જિલ્લાનાપોલીસ મથકો દ્વારા નેશનલ હાઈવે નં.48 ઉપર અકસ્માતો અટકાવવા તેમજ બેફામ સ્પીડમાં દોડતા વાહનોને કન્ટ્રોલ કરવા માટે હાઈવે ઉપર હવે લેઝર સ્પીડ ગનથી પોલીસને તહેનાત કરી દેવાઈ છે. હાઈવે ઉપર વાહન ચાલક કંઈ સમજે વિચારે તે પહેલાં જ આધુનિક ટેકનોલોજી સજ્જ લેઝર સ્પીડ ગન વાહનની સ્પીડ પણ કન્ટ્રોલ કરશે તેમજ ઈ-મેમો પણ ફટકારી દેવાશે. ધરમપુર ચોકડી પર આજે બેફામ દોડતા 10 જેટલા વાહનોને પોલીસે ઈ-મેમો ફટકાર્યા છે. તેથી હાઈવે ઉપર બેફામ દોડતા વાહનોની ગતિ પણ અંકુશીત થશે તેમજ ગમખ્વાર થતા અકસ્માતો પણ અટકશે.