(વર્તમાન પ્રવાહ ન્યુઝ નેટવર્ક)
સેલવાસ, તા.20 : દાદરા નગર હવેલીના સેલવાસ-ખાનવેલ મુખ્ય રસ્તા પર મસાટ, સામરવરણી ગામે એક સાઈડ પરનો રસ્તો આખો ખોદીનાંખવામાં આવેલ છે જેના કારણે નાના મોટા દરેક વાહન ચાલકોને ભારે અગવડતાનો સામનો કરવા પડી રહ્યો છે. હાલમાં જે વૈકલ્પિક સિંગલ રસ્તો ચાલુ છે એ પણ જર્જરિત હોવાના કારણે વાહનચાલકોને જાણે કે ઊંટની સવારી કરતા હોય એવો અહેસાસ થઈ રહ્યો છે. મસાટ અને સામરવરણી ગામમાં રસ્તો પહોળો કરવાની કામગીરી ચાલી રહી છે. સાથે વરસાદી પાણીની ગટરનું કામ પણ એક સાથે ચલાવાઈ રહ્યું છે જેના કારણે જૂની માટી અને મોર્રમ કાઢી નવી માટી નાંખવાની કામગીરી માટે જેસીબી અને હાઈડ્રોલિક મશીન દ્વારા કામ ચાલી રહ્યું છે જેથી ભારે માત્રામાં ધૂળ પણ ઉડતી હોવાથી બાઈકચાલકો સહીત પગપાળા જતા લોકોને હાલાકીનો સામનો કરવા પડી રહ્યો છે.
આ રસ્તાનું કામ મંથરગતિએ ચાલતુ હોવાને કારણે અગવડતાનો સામનો કરી રહેલા વાહનચાલકો અને લોકોમાં ભારે આક્રોશની લાગણી જોવા મળી રહી છે.
