(વર્તમાન પ્રવાહ ન્યુઝ નેટવર્ક)
સેલવાસ, તા.31 : દાદરા નગર હવેલીના અંતરિયાળ વિસ્તાર અને સેલવાસ શહેરી વિસ્તારમાં આજે વહેલી સવારે વાતાવરણમાં પલ્ટો આવ્યા બાદ વીજળીના કડાકા અને પવન સાથે કમોસમી વરસાદ વરસી પડયો હતો. દાનહના સેલવાસ શહેરી વિસ્તાર અને માંદોની, સિંદોની, બેડપા સહિતના ગામોના આસપાસના વિસ્તારમાં વરસાદ વરસ્યો હતો. આ કમોસમી વરસાદને કારણે કેરીના પાક અને શાકભાજીના પાકને મોટું નુકસાન થવાની સંભાવના સેવાઈ રહી છે અને ગામડાઓમાં ખેતરોમાં પણ પાણી ભરાયેલા જોવા મળી રહ્યા છે. હવામાન વિભાગ દ્વારા હજી પણ બે દિવસ વરસાદ પડવાની આગાહી દર્શાવી રહી છે જેના કારણે પ્રદેશના ખેડૂતોમાં ચિંતાનો માહોલ જોવા મળી રહ્યો છે.
