પાંચ દુકાનોના ઘટર તોડયા બાદ એકમાત્ર સલૂનમાંથી રોકડા રૂા.800 મળ્યા
(વર્તમાન પ્રવાહ વાપી બ્યુરો)
વાપી, તા.07: વાપી રેલવે ગરનાળા પાસે આવેલ કોમ્પલેક્ષમાં બુધવારે મધરાતે તસ્કરોત્રાટક્યા હતા. પાંચ વિવિધ દુકાનોના તાળા-શટર તોડયા હતા. ઘટના સીસીટીવી કેમેરામાં કેદ થઈ હતી. એક જ રાતમાં સાગમટે પાંચ દુકાનોના તાળા તૂટતા ચકચાર મચી ગઈ હતી.
વાપી જુના ગરનાળા સામે આવેલ રામેશ્વર પાર્ક અને અમીધારા સોસાયટીમાં આવેલ વિવિધ દુકાનો પૈકી પાંચ દુકાનોના તાળા તૂટયા હતા. તસ્કરોએ માય સ્ટાઈલ હેર સલૂન, પટવારી ઓટોમોબાઈલ, સાંઈ જનરલ સ્ટોર્સ, પરફેક્ટ ઓટો ગેરેજ અને વોશીંગ મશીન રીપેરની પાંચ દુકાનોને ટારગેટ કરી હતી. તસ્કરોનો ફેરો ફોગટ ગયો હતો. જો કે હેર કટીંગ સલૂનમાં રોકડા રૂા.800 મળ્યા હતા. રાત્રે ચોરીની ઘટનાની જાણ થતા દુકાન માલિકો દોડી આવ્યા હતા. ટાઉન પોલીસને જાણ કરી હતી. પોલીસે સીસીટીવી ફૂટેજ મેળવ્યા હતા તેમાં તસ્કરોની હિલચાલ કેદ થયેલી તે આધારે પોલીસે વધુ તપાસ હાથ ધરી હતી.
