વન વિભાગે 8 કિ.મી. પીછો કરતા ટ્રક ચાલક ટ્રક છોડી ભાગી છૂટયો: રૂા.3.15 લાખના હાથ ઘડતરીનો ખેરનો જથ્થો અંદાજીત 5672 ઘન મીટર જપ્ત કરાયો
(વર્તમાનપ્રવાહ વાપી બ્યુરો)
વાપી, તા.18: કપરાડા વન વિભાગની ટીમે માંડવા ગામે ખેરના લાકડા ભરેલી ટ્રક ઝડપી પાડી હતી. ફોરેસ્ટ ટીમે ટ્રકનો 8 કિ.મી. જેટલો પીછો કરતા અંતે ટ્રક ચાલક ગભરાઈને ટ્રક છોડી ફરાર થઈ ગયો હતો.
ફોરેસ્ટ વિભાગના સુત્રો મુજબ પૂર્વ બાતમી આધારે કપરાડા પાનસ ગામે પેટ્રોલીંગ વોચ ગોઠવી હતી તે દરમિયાન બાતમી વાળી ટ્રક નં.એમએચ 04 ઈએલ 0346 આવતા અટકાવાનું ગોઠવાયેલું હતું પરંતુ ટ્રક ચાલકને જાણ થઈ ગયેલી તેથી પુર ઝડપે ટ્રકને હંકારી મુકી હતી. ફોરેસ્ટ ટીમે ટ્રક પાછળ આઠ કિ.મી. સુધીનો પીછો કર્યો હતો. પરંતુ માંડવામાં ટ્રક ચાલક ટ્રક છોડી ફરાર થઈ ગયો હતો. ફોરેસ્ટ ટીમે ટ્રકમાં તપાસ કરતા છોલેલા ખેરના લાકડા નંગ 554 (અંદાજીત 5672 ઘન મીટર) રૂા.3.15 લાખનો જથ્થો મળી આવ્યો હતો. ખેરના લાકડાની આ વિસ્તારમાં મોટા ભાગે ખુબ મોટા પ્રમાણમાં હેરાફેરી થાય છે. કારણ કે આ લાકડું ગુટખા બનાવવામાં ઉપયોગ થતું હોય છે. તેથી ખેર ચોરો અંધારામાં ખેરનો જથ્થો હેરાફેરી કરતા રહે છે.
