વહેલી સવારે વલસાડ સરોધી હાઈવે ઉપર કાર્યવાહી : 20 લાખનો મુદ્દામાલ જપ્ત
(વર્તમાન પ્રવાહ વાપી બ્યુરો)
વાપી, તા.13: વલસાડ જિલ્લામાં ગેરકાયદે રેતી હેરાફેરીનો કારોબાર ધમધમી રહ્યો છે. જેની વ્યાપક ફરિયાદો ઉઠી રહી છે ત્યારે ઊંઘમાંથી સફાળા જાગેલ ખાણ ખનીજ વિભાગે આજે ગુરૂવારે વલસાડ સરોધી હાઈવે ઉપર વહેલી સવારથી વોચ ગોઠવી ચેકિંગ શરૂ કર્યું હતું. તેમાં ઓવરલોડ રેતી ભરેલી ચાર ટ્રકો ઝડપી પાડી કાયદેસરની કાર્યવાહી કરવામાં આવી હતી.
વલસાડ જિલ્લામાં બિલિમોરા ધોલાઈ બંદરેથી મોટા પ્રમાણમાં રેતીનું ખનન ચાલી રહ્યું છે. ગેરકાયદે રેતી જિલ્લામાં ઠાલવવામાં આવતી રહે છે તે માટે લાંબા સમયથી લોકોની રાવ પણ છે ત્યારે અંતેખાણ ખનીજ વિભાગે આજે સફાળા જાગીને રેતી ટ્રકો પકડવાની કાર્યવાહી હાથ ધરી હતી. વલસાડ સરોધી હાઈવે ઉપર વહેલી સવારે ખાણ ખનીજ અધિકારીઓએ ચેકિંગ કામગીરી આરંભી દીધી હતી. જેમાં ઓવરલોડ રેતી ભરેલ ચાર ટ્રકો ઝડપાઈ હતી. ટ્રક નં.જીજે 16 એચ 7685, જીજે 19 વી 9696, જીજે 06 એટી 3361 અને એક નંબર વગરની ટ્રક મળી કુલ ચાર ટ્રક ઝડપી પાડી 20 લાખનો મુદ્દામાલ જપ્ત કરી કાયદેસરની કાર્યવાહી કરી હતી. ખાણ ખનીજ વિભાગની કાર્યવાહીથી રેતી માફિયાઓમાં ફફડાટ વ્યાપી જવા પામ્યો હતો.
