દિન 15માં સમસ્યાના ઉકેલ આવી જશે તેવી પંચાયતે હૈયા ધરપત આપતા મામલો થાળો પડયો
(વર્તમાન પ્રવાહ વાપી બ્યુરો)
વાપી, તા.18: વાપી નજીક આવેલ છીરી ગામના રણછોડ નગરમાં ગંદકીની સમસ્યા ગટરની તકલીફ અને રસ્તાની મુશ્કેલી જેવા મામલાઓથી કંટાળેલા સ્થાનિક રહિશોએ પંચાયતમાં હલ્લાબોલ કરી મોરચો કાઢયો હતો.
વાપીના વિકાસની સાથે સાથે આસપાસના ગામડા બલીઠા, છરવાડા, છીરીનો પણ ઝડપી વિકાસ થયો છે. પરંતુ છીરી વિસ્તાર ગંદકી ભરેલો પ્રમાણમાં વધુ છે. ગીચ ચાલીઓ, આડેધડ એપાર્ટમેન્ટના બાંધકામો, ગટર કે આંતરિક રોડ રસ્તાઓ ઉપર દબાણો જેવા મુદ્દાઓ સમસ્યાઓ છીરીમાંબેસુમાર છે. છીરી રણછોડ નગર વિસ્તારની હાલત કંદકીમાં વધુ ખરાબ થઈ છે. ગટરના પાણી રોડ ઉપર ઉભરાય છે. રોગચાળા અને મચ્છરોનો ઉપદ્રવ વધી પડયો હોવાથી ગતરોજ રણછોડ નગરના સ્થાનિક નિવાસીઓ મોરચો કાઢી પંચાયતમાં પહોંચી પસ્તાળ પાડી હતી. હલ્લાબોલ કરી પંચાયતને સમસ્યાઓના ઉકેલ માટે લેખિત રજૂઆત કરી આવેદનપત્ર પાઠવ્યું હતું. પંચાયતે જણાવ્યું હતું કે, આગામી 15 દિવસમાં સમસ્યાઓનો ઉકેલ લાવવામાં આવશે તેવી હૈયાધરપત આપતા મામલો માંડ થાળે પડયો હતો.