જવાબદાર તંત્ર રોડ માર્કિંગ કે પછી રાત્રિમાં રિફલેક્ટર લાઈટ લગાવે એ ખૂબ જ જરૂરી
(વર્તમાન પ્રવાહ ન્યુઝ નેટવર્ક)
પારડી, તા.19: પારડી નેશનલ હાઈવે પર પારડી ચાર રસ્તા બ્રિજની શરૂઆતમાં અને વલ્લભ આશ્રમ સામે હાઈવે બ્રિજની શરૂઆતમાં બ્રિજની ડીવાઈડર આગળ રોડ માર્કિંગના પટ્ટા અને રિફલેક્ટર લાઈટ ના અભાવે રાતે હાઈવેથી જતાં વાહનચાલકો બ્રિજ શરૂઆતના ડીવાઈડર જોઈ શકતા નથી જેને લઈ વાહનો બ્રિજ ડીવાઈડર સાથે અથડાય ઉપર ચઢી જતાં ગંભીર અકસ્માતો સર્જાય રહ્યા છે. ત્યારે ફરી એક વાર બુધવારના મળસ્કે ચારેક વાગ્યે પારડી વલ્લભ આશ્રમ સ્કૂલ સામે હાઈવેથી પસાર થતું ડમ્પર નંબર ડીડી 01-એલ-9980 નોચાલક બ્રિજ મોહન તિવારી અંધકારમાં બ્રિજ ડીવાઈડર જોઈ ન શકતા ડમ્પર ડીવાઈડર પર ચઢી જતાં ગંભીર અકસ્માત સર્જાયો હતો. સદ નસીબે ડમ્પર પલટી મારતા બચ્યું હતું. આ અકસ્માતમાં ડમ્પરના આગળ ના બને વ્હીલો છૂટા પડી ગયા હતા. આ બાબતની જાણ થતાં હાઈવે ટ્રાફિક પોલીસ ઘટના સ્થળે પહોંચી હતી અને બબ્બે ક્રેન મંગાવી ડમ્પર સાઈડે કરાવ્યુ હતું. પારડી ચાર રસ્તા બ્રિજની શરૂઆતમાં અને વલ્લભ આશ્રમ સામે હાઈવે બ્રિજની શરૂઆતમાં રાત્રીએ સર્જાતા અકસ્માત રોકવા રોડ માર્કિંગ કે પછી રાત્રિમાં રિફલેક્ટર લાઈટ લગાવવામાં આવે તેવી વાહન ચાલકો માંગ કરી રહ્યા છે.
