બાલુભાઈ પટેલની 13 વર્ષીય પુત્રી નીતા બહેનપણી અને પાડોશીઓ સાથે નદીમાં કપડાં ધોવા ગઈ હતી
(વર્તમાન પ્રવાહ વાપી બ્યુરો)
વાપી, તા.03: ધરમપુરના કરંજવેલી ગામે આવેલ માન નદીમાં આજે બુધવારે સવારે કરુણતા ભરી ઘટના ઘટી હતી. બહેનપણી સાથે ગયેલ 13 વર્ષીય કિશોરીનું પાણીમાં ડૂબી જતાં પરિવાર શોકમાં ડૂબી ગયો હતો.
ધરમપુરના કરંજવેલી ગામમાં આજે સવારે બાલુભાઈ પટેલની 13 વર્ષની પુત્રી નીતા બહેનપણી અને પડોશી મહિલાઓ સાથે નદીમાં કપડાં ધોવા ગઈ હતી. બાદમાં બહેનપણી સાથે નદીમાં ન્હાવા પડી હતી પરંતુ ઉંડા પાણીમાં ભૂલથી ચાલી જતા નીતા ડૂબી ગઈ હતી. પડોશીઓને જાણ કરતાં નદી પર દોડી આવ્યા હતા. અડધો કલાકની શોધખોળ બાદ નીતાને બહાર કાઢીને 108 દ્વારા ધરમપુર સ્ટેટ હોસ્પિટલમાં ખસેડાઈ હતી. પરંતુ ફરજ પરના તબીબે નીતાને મૃત જાહેર કરતા પરિવાર ઉપર આભ તૂટી પડ્યું હતું. પરિવારજનોએ ધરમપુર પોલીસમાં જાણ કરતા પોલિસએ એ.ડી નોંધી વધુ તપાસ હાથ ધરી હતી.
