પોલીસે 7 બિસ્કિટ, 2 બ્રેસલેટ, 1 ચેઈન અને બે વિંટી, 9 મોબાઈલ મળી રૂા.2.63 લાખનો મુદ્દામાલ જપ્ત કર્યો
(વર્તમાન પ્રવાહ વાપી બ્યુરો)
વાપી, તા.05: વલસાડ તિથલ રોડ સ્વામિનારાયણ મંદિર ખાતે વલસાડ સિટી પોલીસે આજે ડુપ્લિકેટ સોનાના બિસ્કીટ, ઘરેણાં લઈને શિકારની શોધમાં નિકળેલી નવસારી-સુરતની ગેંગના છ ઈસમોને ઝડપી પાડયા હતા.
વલસાડ સિટી પોલીસને મળેલી બાતમી આધારે આજે તિથલ-સ્વામિનારાયણ મંદિર રોડ ઉપર વોચ ગોઠવી હતી તે દરમિયાન શંકાસ્પદ જણાતા છ ઈસમોને પૂછપરછ કરતા તેઓ ગેંગે ફેફે થઈ ગયા હતા. પોલીસે અંગજડતી કરતા તેમની પાસેથી પીળી ધાતુના 7 બનાવટી બિસ્કિટ, 2 બ્રેસલેટ, 1 ચેઈન અને 2 વિંટી મળી આવી હતી. તપાસતા બે બનાવટી નિકળી હતી. આ અંગે બીલ આધાર માંગતા તેઓ રજૂ કરી શક્યા નહોતા તેથી પોલીસે 41/1ડી હેઠળ 9 મોબાઈલ, એક કાર તથા બાઈક અને બનાવટી દાગીના મળી કુલ રૂા.2.63 લાખનો મુદ્દામાલ જપ્ત કર્યો હતો. તમામ ઈસમો સુરત, નવસારીના હોવાનું તપાસમાં બહાર આવ્યું હતું. શિકારની શોધમાં નિકળેલી ગેંગ પોલીસના હાથે ખુદ શિકાર થઈ જતી જેલ ભેગી કરાઈ હતી.
