વહેલા વરસાદની આગાહીના પગલે અપરિપક્વ કેરી બેડાઈ રહી છે તેથી મણ દીઠ 300 થી 500 રૂા. ભાવ તૂટયો
(વર્તમાન પ્રવાહ વાપી બ્યુરો)
વાપી, તા.21: વલસાડ જિલ્લો એટલે કેરી પાક માટે સમગ્ર ગુજરાત માટે નં.1 રહ્યો છે. હાલમાં કેરીની કુલ સિઝન ચાલી રહી છે. માર્કેટમાં પુષ્કળ પ્રમાણમાં કેરી ઠલવાઈ રહી છે. પરંતુ છેલ્લા બે દિવસથી અપરિપક્વ કેરી બજારમાં આવતા કેરીના ભાવ ગગડી ગયા છે. મણ દીઠ 300 થી 500 નો ભાવ તૂટી ગયો છે.
કેરીની સિઝન પ્રારંભમાં 1800 થી 2000 રૂા.નો ભાવ શરૂ થયો હતો. કમોસમી વરસાદની માનસિકતા આધિન કેરી બજારમાં ઓછી આવશે તેવુ વાતાવરણ હતું પરંતુ માવઠા કે કમોસમી વરસાદની કેરી ઉત્પાદન ઉપર કોઈ ખાસ અસર થયેલી જોવા મળી નહોતી ઉલટાની આવકો દિન પ્રતિદિન વધી રહીહતી તેથી ભાવ કેસરના 1300 થી 1400 થઈ ગયા હતા. હાફૂસ 1000 રૂા. સાત-આઠ દિવસ બજારમાં ભાવો ટકેલા રહ્યા પરંતુ છેલ્લા બે-ત્રણ દિવસ વહેલી વરસાદ આવશે તેવી વાઈકાને લઈ ખેડૂતો અપરિપક્વ કેરીઓ બેડવાનું શરૂ કરી દીધુ. બજારમાં કેરીની આવક બેવડાઈ જતા બજાર ભાવમાં 300 થી 500 રૂા.નો હાલમાં ઘટાડો થઈ ચૂક્યો છે.
