(વર્તમાન પ્રવાહ વાપી બ્યુરો)
વાપી, તા.25: વાપી સ્ટેશન રોડ ઉપર ઝાડના છાંયડામાં પાર્ક કરેલી કાર ઉપર અચાનક ઝાડ પડતા બજારમાં લોકો એકઠા થઈ ગયા હતા. જો કે અંદર બેઠેલા બે યુવાનોનો ચમત્કારિક બચાવ થયો હતો.
કહેવત છે કે, ‘‘રામ રાખે તેને કોણ ચાખે” આ કહેવત આજે ગુરૂવારે બપોરે વાપીમાં સાર્થક થયેલી જોવા મળી હતી. અતિશય ગરમીના કારણે બે યુવાનોએ તેમની કાર વાપી સ્ટેશન રોડ ઉપર એક વૃક્ષની નીચે છાંયડામાં પાર્ક કરી હતી ત્યાં અચાનક કાર ઉપર ઝાડ પડયું હતું. બન્ને યુવાનો ગમે તેમ કરીને કારની બહાર નિકળી ગયા હતા. દ્રશ્ય જોઈને એવું લાગે છે કે, અંદર બેઠેલા દબાઈ ગયા હશે કે ઘાયલ થયા હશે. પરંતુ સદ્નસીબે એવું કંઈ જ થયું ન હતું. ઘટના ઘટયા બાદ લોકોના ટોળેટોળા એકઠા થઈ ગયા હતા. તરેહ તરેહની વાતોનો દોર ચાલી રહ્યો હતો. ત્યાં બન્ને યુવાનોને સ્વસ્થ નિહાળતા લોકોએ શાંતિનો દમ લીધો હતો. જો કે, અકસ્માતમાં કારને સારું એવું નુકશાન ફહોંચ્યું હતું.
