મોરબી,બોટાદ, સુરેન્દ્રનગર, આણંદ, વાપી મળી 22 શહેરોનો કોર્પોરેશનનો દરજ્જો આપવાની ચાલતી વિચારણા
(વર્તમાન પ્રવાહ વાપી બ્યુરો)
વાપી, તા.25: વાપી શહેરને આગામી સમયે મહાનગર પાલિકાનો દરજ્જો મળે તેવા સંકેતો સાંપડયા હતા. આગામી સમયે વાપીને મહાનગર પાલિકા એટલે કે કોર્પોરેશનનો દરજ્જો પ્રાપ્ત થશે.
ઘણા સમયથી વાપીને મહાનગર પાલિકા બનાવવાની ચર્ચાઓ ચાલતી હતી. જેમાં છરવાડા, બલીઠા, છીરી, રાતા, ચણોદ, નામધા, ચંડોર જેવા 12 ગામ મહાનગર પાલિકામાં સમાવિષ્ટ થઈ જશે. જો કે વાપી તો મહાનગર પાલિકાના દરજ્જામાં અગાઉ આવી શકે એમ હતી. પરંતુ સ્થાનિક રાજકારણીઓની ગરાસ લુંટાતી હોવાથી મહાનગર પાલિકાનો દરજ્જો મળવામાં રોડા નાખતા હતા. પરંતુ હવે સરકાર ત્રણ લાખથી વધુ વસ્તી ધરાવતા નગરો જેવા કે મરોલી, બોટાદ, સુરેન્દ્રનગર, આણંદ, ભરૂચ, વાપી જેવા 22 જેટલા નગરોને મહાનગર પાલિકામાં રૂપાંતરીત કરવાની વિચારણા હાથ ધરાઈ છે તેથી વાપી મહાનગર પાલિકાના દરજ્જામાં સમાવેશ થવાના ઉજળા સંકેતો મળી રહ્યા છે.
