સેવા સદનમાં જાતિ-આવકના દાખલા સહિતના કામો માટે આવતા અરજદારોને પીવાના પાણીના કુલરો બંધ રહેતા પડી રહેલી હાલાકી
(વર્તમાન પ્રવાહ ન્યુઝનેટવર્ક)
ચીખલી(વંકાલ),તા.07: ચીખલી તાલુકા સેવા સદનમાં મામલતદાર, સબ રજીસ્ટાર, પ્રાંત અધિકારી સહિતની મુખ્ય કચેરીઓ કાર્યરત છે અને સેવા સદન દિવસભર લોકોની અવાર જવરથી ધમધમતું હોય છે. આ ઉપરાંત હાલમાં જ બોર્ડ પરિક્ષાઓના પરિણામ જાહેર થયા હોય જાતિ, આવક ઉન્નતવર્ગ સહિતના દાખલાઓ, અન્ય નાના મોટા કામો માટે અરજદારોની રીતસરની ભીડ જોવા મળી રહી છે.
ઉપરોક્ત સ્થિતિમાં હાલે ભર ઉનાળે આકરી ગરમીમાં તાલુકા સેવા સદનમાં પીવાના પાણીના કુલરો બંધ હાલતમાં છે. સેવાસદનમાં ભોંયતળિયા, પહેલા માળે અને બીજા માળે ત્રણેય કુલરો બંધ હાલતમાં જોવા મળી રહ્યા છે. પહેલા માળે અને ભોંય તળિયામાં તો પીવાના પાણીના રૂમમાં ઠંડુ પાણી તો ઠીક પણ નળમાં સાદું પાણી પણ આવતું નથી. બીજા માળે સાદું પાણી આવે છે. પરંતુ ત્યાં પણ કુલર તો બંધ હાલતમાં જ છે. ત્યારે સેવા સદનમાં ભર ઉનાળે પીવાના પાણીની વ્યવસ્થાના અભાવે લોકોએ તરસ છીપાવવા માટે ભટકવાની નોબત આવી છે. ચોમાસા, શિયાળામાં તો ઠીક પરંતુ હકીકતમાં તો ઉનાળા પૂર્વે જ આગોતરું આયોજન કરી પીવાના પાણીની વ્યવસ્થા કાર્યરત રહે તે માટે મામલતદાર સહિતના ઉચ્ચ અધિકારીઓ દ્વારા તકેદારી રાખવી જોઈએ પરંતુ કદાચ ઉચ્ચઅધિકારીઓને તેમની ફરજમાં પીવાના પાણીની વ્યવસ્થા ન આવતી હશે કે પછી તેઓને આ માટે કોઈ ગંભીરતા ન હોય તેમ લાગી રહ્યું છે.
તાલુકા સેવાસદનમાં મામલતદારના જણાવ્યાનુસાર બીજી વ્યવસ્થા કરી પણ તે કયાં તે તેમને ખબર નથી. સેવા સદનમાં પીવાના પાણીના કુલરો બંધ હોવા અંગે મામલતદાર રોશનીબેનનો સંપર્ક કરતા તેમણે જણાવ્યું હતું કે બંધ કુલરો માટે જિલ્લા કલેકટર કચેરીમાં લેખિત રજૂઆતત કરવામાં આવેલ છે. અને પાણીની બીજી વ્યવસ્થા છે. જોકે સેવા સદનમાં આ વ્યવસ્થા કયાં છે. તેમ પૂછતા એ તો હું ક્યાંથી કહું તમે જ આવીને જોઈ લેવોને તેવો જવાબ આપતા મીડિયાકર્મી દ્વારા રૂબરૂ તપાસ કરતા ફલડ કંટ્રોલ રૂમની કેબિનમાં એક ઠંડા પાણીનો જગ સિવાય બીજે કયાંય નજરે પડ્યા ન હતા. ઉપરોક્ત સંજોગોમાં પોતાની વહીવટી બેદરકારી પર ઢાંકપીછોડો કરવાનો પ્રયાસ કરાયો હોય તેવું ફલિત થવા પામ્યું હતું.