(વર્તમાન પ્રવાહ ન્યુઝ નેટવર્ક)
પારડી, તા.20: પારડી તાલુકાના ટુકવાડા-મોરાઈ ગામના મધ્યેથી પસાર થતી કોલક નદીમાં વાપી કબ્રસ્તાન રોડ ખાતે રહેતા છ જેટલા બાળકો સાયકલ લઈ ન્હાવા માટે કોલક નદીના ડેમ પાસે આવ્યા હતા.
આ છ પૈકી પાંચ બાળકો ન્હાવા માટે નદીમાં ઉતર્યા હતા પરંતુ તરતા આવડતુ ન હોય પાંચ પૈકી બે કિનારે આવી જતા બચી જવા પામ્યા હતા જ્યારે અન્ય ત્રણ બાળકો ડૂબવા લાગ્યા હતા.
આ દરમ્યાન પિચિંગ પાસેથી પસાર થતા બચુભાઈ નામનાવ્યક્તિએ બચાવો બચાવોની બૂમો સાંભળતા પીચિંગ પાસે ડુબી રહેલ એક બાળકને સમય સૂચકતા વાપરી બાજુમાં પડેલ રસ્સીનો ટુકડો પાણીમાં નાખી હાથ પકડી એક બાળકને બહાર ખેચી લઈ જીવ બચાવ્યો હતો. ત્યારબાદ બચુભાઈએ તો ટુકવાડા ખાતે રહેતા શૈલેષભાઈને ફોન દ્વારા ઘટનાની જાણ કરતા અને બે છોકરાઓ પૈકી એક છોકરો પીલર પકડીને બ્રિજની નીચે ઉભો રહ્યો હોય તાત્કાલિક દોરડું લઈને આવી જવાનું કહેતા શૈલેષભાઈ પોતાના છોકરા સમર્થ સાથે તાત્કાલિક સ્થળ પર આવી પહોંચ્યા હતા અને સમર્થ એ બ્રિજ પરથી દોરડું નાખી પીલર પકડીને ઊભા રહેલ બાળકને સપોર્ટ આપ્યો હતો. ત્યારબાદ ટુકવાડાના તરવૈયા એવા અલ્કેશભાઈ અને વિજયભાઈએ આ બીજા બાળકને પણ રેસકયૂ કરી બચાવી લીધો હતો. આમ ન્હાવા ઉતરેલા પાંચ પૈકી ચાર બાળકોને બચાવી લેવાયા છે, જ્યારે એક લાપતા બન્યો હતો. એમને શોધવા માટે પારડી ચંદ્રપુર ખાતેની ચંદ્રપુર લાઈફ સેવર ટ્રસ્ટના યુવાનો આજરોજ સવારે જઈ શોધખોળ આદરતા મૃત હાલતમાં એક બાળક મળી આવતા સમગ્ર વાતાવરણ ગમગીન બની ગયું હતું.
ઘટનાની જાણ થતા પારડી પોલીસના પી.એસ.આઈ. વસાવા પણ તાત્કાલિક સ્થળ પર પહોંચી ગયા હતા.
