(વર્તમાન પ્રવાહ ન્યુઝ નેટવર્ક)
વલસાડ, તા.13: વલસાડ જિલ્લાના પારડી તાલુકાના પરીયા હરણ ફળિયા પ્રા. શાળા અને પરીયા વેલવાગડ પ્રા. શાળામાં કન્યા કેળવણી અને શાળા પ્રવેશોત્સવ કાર્યક્રમની ઉજવણી વલસાડ- ડાંગ જિલ્લાના સાંસદશ્રી ડૉ. કે. સી. પટેલના અધ્યક્ષસ્થાને કરવામાં આવી હતી. આ પ્રસંગે ગામના સરપંચ ડિમ્પલબેન, સી.આર.સી. કો-ઓર્ડિનેટર નયન પટેલ હાજર રહ્યા હતા. આ કાર્યક્રમ દરમિયાન ડૉ. કે. સી. પટેલે જીવનમાં શિક્ષણનું પ્રથમ સોપાન કંડારવા જઈ રહેલા શાળાના ભૂલકાઓને આશીર્વચનો આપ્યા હતા. તેમણે પોતાનું પ્રાથમિક શિક્ષણ સરકારી શાળામાં લઈને સફળતાના સોપાનો સર કર્યા હોવાનું જણાવી વિદ્યાર્થીઓને પ્રોત્સાહિત કર્યા હતા. અંતે તેમના હસ્તે શાળામાં વૃક્ષારોપણ કરવામાં આવ્યું હતું.
