સ્થાનિક નાગરિકો ટ્રાફિક પોલીસની સેવા બજાવી : ઘાયલ ચાલકોની સારવાર કરી
(વર્તમાન પ્રવાહ વાપી બ્યુરો)
વાપી, તા.22: વલસાડ શહેરમાં કેરી માર્કેટ સામે ગત સાંજે અજીબોગરીબ ઘટના ઘટી હતી. રોડ ઉપર ફેલાયેલ ચીકણા પાણી અને કાદવ-કીચડને કારણે 25 ઉપરાંત ટુ વ્હિલર ચાલકો ફટાફટ સ્લીપ ખાઈ ગયેલા. સ્થાનિક નાગરિકોએ ટ્રાફિક પોલીસની ભૂમિકા અદા કરી હતી.
વલસાડ કેરી માર્કેટસામે મોગરાવાડી જતા રોડ ઉપર મ્યુનિસિપલ સ્કૂલ સામે ખાનગી નવિન બોરીંગની કામગીરી થઈ હતી. આ કામગીરીમાં ચીકણું પાણી અને કાદવ-કીચડ રોડ ઉપર ફેલાઈ જવા પામ્યો હતો. સાંજના સમયે અંધારામાં અહીથી પસાર થતા 25 ઉપરાંત ટુ વ્હિલર ચાલકો સ્લીપ ખાઈ ગયા હતા. જેમાં કેટલાક ઈજાગ્રસ્ત પણ થયા હતા. આ બાબતે પાલિકાને જાણ પણ કરાઈ હતી. પણ કોઈ ફરક્યુ નહોતું. કોઈ વધુ મોટો અણ ઈચ્છીત બનાવ ના બને એ માટે સ્થાનિક નાગરિકો આગળ આવ્યા હતા. ટ્રાફિક પોલીસની ભૂમિકા અદા કરી વાહન વહેવાર નિયંત્રિત કર્યો હતો. તેમજ સ્લીપ ખાઈ નીચે પડેલાઓની પ્રાથમિક સારવાર પણ નાગરિકોએ કરી હતી.
