ડોકમરડી ખાતે નિર્માણાધિન બ્રિજની સાઈડ પરના કામચલાઉ રસ્તા પર ખાડામાં પાણી ભરાવાથી ટ્રકે મારેલી પલ્ટી
(વર્તમાન પ્રવાહ ન્યુઝ નેટવર્ક)
સેલવાસ, તા.27 : છેલ્લા ચોવીસ કલાક દરમિયાન દાદરા નગર હવેલીમાં પાંચ ઇંચથી વધુ વરસાદ વરસ્યો છે. સેલવાસના ડોકમરડી ખાતે બની રહેલ નવા બ્રિજના કારણે સાઈડ પરથી કામચલાઉ રસ્તા પર ખાડામાં પાણી ભરાયા હતા જેના કારણે ટ્રકનું સંતુલન નહીં રહેતા પલ્ટી મારી ગઈ હતી. ટ્રક સાઈડ પર પલ્ટી હતી જેના કારણે ચાલક ફસાઈ ગયો હતો. જેને આજુબાજુના દુકાનદારોએ દરવાજો તોડી બહાર કાઢયો હતો.
જ્યારે મસાટથી લઈ રખોલી સુધી રસ્તાનું કામ ચાલતુ હોવાને કારણે અને અધુરા કામને કારણે વારંવર ટ્રાફિકજામના દ્રશ્યો જોવા મળ્યા હતા. આજે સેલવાસમાં 138.6 એમએમ પાંચ ઇંચથી વધુ અને ખાનવેલમાં 91.8 એમએમ 3.36 ઇંચ વરસાદ વરસ્યો હતો. મધુબન ડેમનું લેવલ 65.80મીટર છે અને ડેમમાં પાણીની આવક 1425 ક્યુસેક અને જાવક 212 ક્યુસેક છે.
