(વર્તમાન પ્રવાહ ન્યુઝ નેટવર્ક)
સેલવાસ, તા.03 : સેલવાસ આર.ટી.ઓ. કચેરીમાં છેલ્લા દસ દિવસથી સર્વર ડાઉન રહેવાના કારણે ડ્રાઈવિંગ ટેસ્ટ, લાયસન્સ રીન્યુ, નવા લાયસન્સ બનાવવા માટે રસીદો નહીં બનવાને કારણે તમામ કામો ઠપ્પ થતાં અરજદારોને રઝળપાટ કરવો પડી રહ્યો છે. આર.ટી.ઓ. કચેરીએ અરજદારોની રોજ રોજ લાંબી લાંબી લાઈનો જોવા મળી રહી છે. ઈન્ટરનેટ સર્વર ડાઉન હોવાને કારણે ઓનલાઇન અરજીઓનો પણ નિકાલ થઈ નથી રહ્યો.
પ્રાપ્ત માહિતી મુજબ સેલવાસ આર.ટી.ઓ. કચેરીમાં ટુ વ્હીલર, ફોર વ્હીલર તથા અન્ય તમામ વાહનોના લાયસન્સ માટે આવતા અરજદારોના માટે લર્નિંગ લાયન્સ, ડ્રાઈવિંગ ટેસ્ટ, હેવી લાયસન્સ વગેરેની કામગીરી શરૂ નહીં થતાં અરજદારો અટવાઈ રહ્યા છે અને જૂના લાયસન્સો જેમની અંતિમ તારીખ પુરી થવાની સમય મર્યાદા હોય તેઓના પણ લાયસન્સ રિન્યુ નહીં થતાં અને નવા લાયસન્સ બનાવનાર અરજદારોને રસીદ નહીં મળવાને કારણે તેઓના લાયસન્સના કામો પણ અટવાઈ રહ્યા છે. સેલવાસ આર.ટી.ઓ. વિભાગના અધિકારીઓ દ્વારા આ પ્રશ્નનો ઝડપી ઉકેલ લાવવામાં આવે એવી અરજદારોની માંગ છે.
