(વર્તમાન પ્રવાહ ન્યુઝ નેટવર્ક)
પારડી, તા.12: પારડી ચાર રસ્તાના ઓવરબ્રિજ પર હાઈવેની રેલિંગને કોઈ વાહન તોડી ગયું હોય આ રેલિંગમાં અન્ય વાહનો ભેરવાઈ અકસ્માત ન થાય જેને લઈ પારડી પોલીસના પી.આઈ બી.જે. સરવૈયા તેમની ટીમ સાથે ઘટના સ્થળે પહોંચ્યા હતા. ઘટના સ્થળે પહોંચેલી પોલીસ સ્થળનું નિરીક્ષણ કરી રેલિંગ હટાવવાની કામગીરી કરાવે તે પહેલા વાપી જતાં ટ્રેક પર અગાઉથી ઊભેલો એક પીકઅપ ટેમ્પો નંબર જીજે-15-એટી-7904 ના પાછળ મોપેડ નંબર જીજે-21-ડીએ-3257 નો ચાલક આવી ધડાકાભેર ટેમ્પો પાછળ ઘૂસી જતાં ઈજાના કારણે ઘટના સ્થળે જ અર્ધ બેભાન થઈ ગયો હતો. પારડી પોલીસે 108ને જાણ કરવા છતાં ઈજાગ્રસ્ત જલ્દી સારવાર મળેતે હેતુસર પી.આઈ. બી.જે. સરવૈયાએ પોલીસ સ્ટાફને ઈજાગ્રસ્તને પોલીસ વાનમાં હોસ્પિટલ લઈ જવાનું કહેતા પોલીસ જવાનો તાત્કાલિક ઈજાગ્રસ્તને ઉચકી પોલીસ વાનમાં બેસાડી પારડી હોસ્પિટલ લઈ જઈ દાખલ કર્યો હતો. ખરેખર પારડી પોલીસે ફરજ સાથે ઈજાગ્રસ્તનો જીવ બચાવવા તાત્કાલિક સારવાર મળે એ આશયથી પોલીસ વાનમાં હોસ્પિટલ પહોંચાડી માનવતાનું ઉદાહરણ પૂરું પાડ્યું હતું.
