વિદ્યાર્થીનીઓને મેસેજો કરી ફોટા અને પૈસાની પણ માંગણી કરતો હતો ટયૂશન શિક્ષક
(વર્તમાન પ્રવાહ ન્યુઝ નેટવર્ક)
સેલવાસ, તા.14 : સેલવાસના લેન્ડમાર્ક બિલ્ડીંગમાં ચાલી રહેલ આકાશ બાયજૂસ ટયૂશન ક્લાસીસના એક શિક્ષક વિદ્યાર્થીનીઓને મેસેજ કરી હેરાન કરતો હોવાની ફરિયાદ પોલીસ સ્ટેશનમાં પહોંચી હતી.
પ્રાપ્ત વિગત અનુસાર સેલવાસના ટોકરખાડા લેન્ડમાર્ક બિલ્ડીંગમાં આવેલ આકાશ બાયજૂસ ટયૂશન ક્લાસીસમાં રોહિત નામના શિક્ષક દ્વારા ક્લાસમાં આવતી વિદ્યાર્થીનીઓને મોડી રાત્રે અભદ્ર મેસેજ કરી ફોટા માંગતો હતો. સાથે પૈસાની પણ માંગ કરતો હતો. જે સંદર્ભે છોકરીએ એમના પરિવારને જાણ કરતા પરિવારના સભ્યો ક્લાસિસ સ્થળે પહોંચ્યા હતા અને ત્યારબાદ પોલીસને બોલાવી ફરિયાદ કરતા ચકચાર મચી ગઈ હતી.
પોલીસની ટીમ ક્લાસીસ સ્થળે પહોંચી શિક્ષક અને વિદ્યાર્થીનીઓની પૂછપરછ હાથ ધરવામાં આવી હતી. આ ક્લાસમાં પાંચસોથી વધુ વિદ્યાર્થીઓ ટયુશન લેવા માટે આવે છે. જેમાંથી કેટલીક વિદ્યાર્થીનીઓને આ શિક્ષક દ્વારા મોડી રાત્રે મેસેજો કરતો રહે છે તેથી કેટલીક વિદ્યાર્થીનીઓ ડરના કારણે પોતાના વાલીઓ કે ક્લાસના સંચાલકોને ફરિયાદ કરતા ન હતા. હાલમાં સેલવાસ પોલીસે શિક્ષકની અટક કરી ઘટનાઅંગેની વધુ તપાસ હાથ ધરી છે.
