(વર્તમાન પ્રવાહ વાપી બ્યુરો)
વાપી, તા.23: વલસાડ જિલ્લામાં સતત ત્રણ દિવસથી મેઘોમહેરબાન થયો છે ત્યારે વલસાડ જિલ્લાની તમામ નદીઓ હાલ બે કાંઠે જોવા મળી છે. વલસાડના કપરાડા અને ધરમપુરમાં ધોધમાર વરસાદ વરસી રહ્યો છે. જેના કારણે નાના નાના કોઝવે પાણીમાં ગરકાવ થયા છે. નીચાણવાળા વિસ્તારોમાં લો લેવલ કોઝવે પર પાણી ફરી વળ્યા છે. કરચોન્ડ નજીક રાંધા અને કૌચાને જોડતા કોઝવે પર તુલસી નદીના પાણી ફરી વળતા બંને તરફના ગામના લોકો મુશ્કેલીમાં મુકાયા છે. કોઝવે પસાર કરવા કલાકો સુધી રાહ જોવી પડે છે. કેટલાક લોકો જીવને જોખમમાં મૂકી કોઝવે પસાર કરતાં જોવા મળ્યા હતા. આજે પણ વલસાડ જિલ્લામાં ભારેથી અતિભારે વરસાદની આગાહી કરવામાં આવી છે.