મહેક ગજેરા ગૃપએ ભારતનું પ્રતિનિધિત્વ કર્યુ હતું :
ફેસ્ટીવલમાં 12 દેશના કલાકારોએ ભાગ લીધો હતો
(વર્તમાન પ્રવાહ વાપી બ્યુરો)
વાપી, તા.04: યુરોપીયન દેશ હંગેરીમાં આંતરરાષ્ટ્રિય ફોલ્ક ડાન્સ ફેસ્ટીવલ અને ગ્રીસમાં લેફકાડા ઈન્ટરનેશનલ ફોલ્ક ડાન્સ ફેસ્ટીવલ યોજાયો હતો. જેમાં ભારત તરફથી પ્રતિનિધિત્વ ગુજરાત વાપીના મહેક ગજેરા ગૃપ કરી ભારતીય નૃત્યકલા વારસો અને સંસ્કૃતિની પ્રસ્તૂતિ કરી કલા વારસાની સુવાસ વિશ્વ ફલક ઉપર ફેલાવી હતી. ભારતીય કલ્ચર ઉજાગર કર્યું હતું.
ઓગસ્ટ મહિનાના અંતમાં હંગેરી ખાતે 26માં આંતરરાષ્ટ્રિય ફોલ્ક ફેસ્ટીવલ અને ગ્રીસમાં લેફકાડા ઈન્ટરનેશનલ ફોલ્ક ડાન્સ ફેસ્ટીવલનું આયોજન કરવામાં આવ્યું હતું. બન્ને ડાન્સ ફેસ્ટીવલમાં ગુજરાત વાપીના મહેક ગજેરા ગૃપ-એ મેદાન મારી ભારતનું પ્રતિનિધિત્વ કર્યું હતું. ભારતભરમાંથી ફોસ્ટીવલ માટે વાપીના ગૃપની પસંદગી થઈ હતી. જોગાનુજોગ તે સમયે વડાપ્રધાન નરેન્દ્ર મોદી પણ ગ્રીસ પ્રવાસે જ હતા. તેઓ ફેસ્ટીવલની મુલાકાત લેવાના હતા પરંતુ વ્યસ્તતાને લઈ મુલાકાત લઈ શક્યા નહોતા. આ સિધ્ધિનો આનંદ વ્યક્ત કરતા મહેક શિવાંગ ગજેરાએ જણાવ્યું હતું કે, હંગેરીમાં તેમના ગૃપએ ભારતના પરંપરાગત પ્રાચીન ગરબા, ટીપ્પની નૃત્ય, ડાંગી નૃત્ય, ડાકલા નૃત્ય, પરંપરાગતગામડાના દૃશ્યમાં પ્રસ્તૂત કર્યા હતા તેમજ ઐઈગીરી નંદિની સ્તોત્રમ, શાષાીમ, ભરતનાટયમ્ નૃત્ય રજૂ કરી હંગેરીઓના દિલ જીતી લીધા હતા. આ કલ્ચરલ ફેસ્ટીવલમાં મેક્સિકો, યુક્રેન, જાપાન, ઈન્ડોનેશીયા, જ્યોર્જિયા, કોલંબિયા, ચીલી જેવા 12 દેશોએ ભાગ લીધો હતો. આ ઈવેન્ટ યુનેસ્કો અને ગ્રીસ, હંગેરી સરકાર દ્વારા યોજવામાં આવ્યો હતો. વિશેષ તો મહેક ગજેરાએ જણાવ્યું હતું કે, વિદેશીઓને ગરબાના સ્ટેપ શિખવાડયા હતા.
