(વર્તમાન પ્રવાહ ન્યુઝ નેટવર્ક)
ચીખલી (વંકાલ), તા.13: ચીખલી તાલુકા પંચાયતમાં આગામી અઢી વર્ષની ટર્મ માટે ભાજપ દ્વારા પદાધિકારીઓના નામોની જાહેરાત કરાતા પ્રમુખપદ માટે સાદડવેલના રાકેશભાઈ પટેલ અને ઉપપ્રમુખ પદે સાદકપોરના રમેશભાઈ પટેલ દ્વારા ટીડીઓ સમક્ષ ઉમેદવારીપત્રકો રજૂ કરવામાં આવ્યા હતા. આ સાથે ભાજપ દ્વારા કારોબારી અધ્યક્ષ માટે ચાસાના દમયંતીબેન આહીર, શાસક પક્ષના નેતા તરીકે ગોડથલના અશ્વિનભાઈ દેસાઈ અને દંડક પદે રાનવેરી ખૂર્ડના પંકજભાઈ પટેલના નામની જાહેરાત કરાઈ હતી.
ચીખલી સર્કિટ હાઉસમાં યોજાયેલ બેઠકમાં પ્રભારી ડો.અમીતાબેન, નિલેશભાઈ દ્વારા તાલુકા પંચાયતના પ્રમુખ પદ માટે સાદડવેલના રાકેશભાઈ મગનભાઈ પટેલ ઉપ પ્રમુખ માટે સાડકપોરના રમેશભાઈ લક્ષ્મણભાઈ પટેલ કારોબારી અધ્યક્ષ માટે ચાસાના દમયંતીબેન આહીર શાસકપક્ષના નેતા પદે ગોડથલના અશ્વિનભાઈ દેસાઈ દંડકપદે રાનવેરી ખૂર્ડના પંકજભાઈ પટેલના નામોની જાહેરાત કરાઈ હતી. જોકે સામાજિક ન્યાય સમિતિના અધ્યક્ષ નામની જાહેરાત કરાઈ ન હતી.
આ પ્રસંગે એપીએમસીના ચેરમેન કિશોરભાઈ પટેલે નવી ટીમને અભિનંદન પાઠવતાજણાવ્યું હતું કે, પ્રજાલક્ષી અભિગમના વહીવટ સાથે પક્ષના સંગઠનને મજબૂત બનાવવા અનુરોધ કરી પક્ષ જ સર્વોપરી હોય પક્ષના નિર્ણય ને તમામને માથે ચઢાવવા હાંકલ કરી હતી. પૂર્વ જિલ્લા પંચાયત પ્રમુખ ડો.અમીતાબેન અને પક્ષ પ્રમુખ મયંકભાઈ દ્વારા વિતેલા અઢી વર્ષના શાસનને બિરદાવી આભારની લાગણી વ્યક્ત કરી હતી.
બાદમાં ટીડીઓ ચેતનભાઈ દેસાઈ સમક્ષ પ્રમુખપદ માટે રાકેશભાઈ પટેલ અને ઉપ પ્રમુખ પદ માટે રમેશભાઈ પટેલ દ્વારા ઉમેદવારીપત્રક રજૂ કરવામાં આવ્યા હતા. જેમાં અનુક્રમે વર્તમાન પ્રમુખ કલ્પનાબેન ગાંવિત અને કારોબારી અધ્યક્ષ ધર્મેશભાઈ પટેલ દ્વારા દરખાસ્ત કરવામાં આવી હતી.
જોકે પ્રમુખ-ઉપ પ્રમુખ માટે એક એક જ ઉમેદવારીપત્રક રજૂ થતા ગુરુવારના રોજ યોજાનારી બેઠકમાં ચૂંટણીની ઔપચારિકતા જ કરવાની રહેશે. ભાજપ દ્વારા પ્રમુખ અને ન્યાય સમિતિના અધ્યક્ષ પદ માટે ઓબીસી સમાજના સભ્યોને ફાળવી એક રીતે જાતિવાદનું સમીકરણ સાચવવામાં આવ્યું છે. તાલુકા પંચાયતના હોદ્દેદારોના નામની જાહેરાત થતા જ તેમના સમર્થકોમાં આનંદની લાગણી છવાઈ ગઈ હતી. આ દરમ્યાન જિલ્લા પંચાયતના બાંધકામ અધ્યક્ષ દિપાબેન, નિકુંજભાઈ પટેલ સહિતના જિલ્લા પંચાયતના સભ્યો ઉપસ્થિત રહ્યા હતા.