(વર્તમાન પ્રવાહ ન્યુઝ નેટવર્ક)
ચીખલી,(વંકાલ), તા.14: ચીખલી તાલુકા પંચાયતના સભાખંડમાં પ્રાંત અધિકારી અમિતભાઇ ચૌધરીની અધ્યક્ષતામાં ટીડીઓ ચેતનભાઈ દેસાઈની ઉપસ્થિતિમાં યોજાયેલ ચૂંટણીમાં પ્રમુખપદ માટે સાદડવેલ બેઠક પરથી ચૂંટાયેલા રાકેશભાઇ મગનભાઇ પટેલની દરખાસ્ત કલ્પનાબેન ગાવિતે અને ઉપપ્રમુખ માટે સાદકપોર બેઠકના રમેશભાઇ લક્ષમણભાઈ પટેલની દરખાસ્ત ધેજના સભ્ય ધર્મેશભાઈ દ્વારા કરવામાં આવી હતી.બંને હોદ્દાઓ માટે એક એક જ ઉમેદવારી પત્રક આવતા પ્રાંત અધિકારી અમિતભાઇ ચૌધરીએ બંનેને બિન હરીફ ચૂંટાયેલા જાહેર કર્યા હતા.
ચૂંટણી પ્રક્રિયા બાદ બંને હોદ્દેદારોએ વિધિવત ચાર્જ સંભાળી લીધો હતો.પ્રમુખ અને ઉપપ્રમુખ ઉપરાંત ભાજપ દ્વારા જાહેર કરાયેલ કારોબારી સમિતિના અધ્યક્ષ પદના દમયંતીબેન આહીર શાસક પક્ષના નેતા અશ્વિનભાઈ દેસાઈ દંડક પદના પંકજભાઈ પટેલ સહિતનાઓને તાલુકા સભ્યો ઉપરાંત એપીએમસીના ચેરમેન કિશોરભાઈ પટેલ પક્ષ પ્રમુખ મયંકભાઇ ઉપપ્રમુખ પ્રકાશભાઈ,દિપકભાઇ, સહિતનાઓએ નવી ટીમને અભિનંદન પાઠવ્યા હતા.
જોકે આજે માત્ર પ્રમુખ અને ઉપપ્રમુખની જ ચૂંટણી યોજાઈ હતી.આવનારી સામાન્ય સભામાં કારોબારી સમિતિ અને ન્યાય સમિતિની રચના બાદ પક્ષના મેન્ડેટ મુજબ બંને સમિતિઓના અધ્યક્ષોની વરણી થશે.આ પૂર્વે ચીખલીમાં ભાજપ દ્વારા વિશાળ રેલી યોજવામાં આવી હતી.વિશ્રામ ગૃહથી રેલી આકારે સભ્યો તાલુકા પંચાયત કચેરીમાં ગયા હતા.