(વર્તમાન પ્રવાહ વાપી બ્યુરો)
વાપી, તા.22: વાપી હરિયા હોસ્પિટલ કમ્પાઉન્ડમાં પાર્ક કરેલ આઈ-20 કારમાં રૂપસુંદરી નામનો સાપ ભરાઈ જતા દોડધામ મચી જવા પામી હતી.
વાપી હરિયા હોસ્પિટલમાં દર્દીને મળવા આવેલ મહિલાએ તેમની આઈ-20 કાર હોસ્પિટલના કમ્પાઉન્ડમાં પાર્ક કરી હતી. દર્દીને મળ્યા બાદ પરત ફરતા મહિલાએ ડેસ્કબોર્ડ ઉપર સાપ જોતા ગભરાઈ ગઈ હતી. તે પછી સાપ ડેશબોર્ડમાં ઘૂસી જતા બહાર કાઢવો મુશ્કેલ બની ગયેલ. ઘટનાની જાણ વાપી એનિમલ રેસ્ક્યુના વર્ધમાન શાહને કરવામાં આવતા ટીમ સાથે તેઓ દોડી આવ્યા હતા. સાચવીને કાર ગેરેજમાં લઈ જવામાં આવી હતી. ત્યારબાદ સિફતપૂર્વક રૂપસુંદરી સાપને બહાર કઢાયો હતો. આ સાપ ઝેરી હોતો નથી તે રેસ્ક્યુ ટીમ જાણતી હતી. અંતે સાપ બહાર કાઢયા બાદ કાર મહિલાને સોંપી દેવાઈ હતી.
