ત્રણ ક્રેઈનની મદદથી ચાર કલાકની જહેમત બાદ ટ્રક હટાવાઈ :
હાઈવે ઉપર ટ્રાફિક જામ
(વર્તમાન પ્રવાહ વાપી બ્યુરો)
વાપી, તા.24: વલસાડ હાઈવે ધરમપુર ચોકડી ઓવરબ્રિજ ઉપર આજે રવિવારે સવારે ગંભીર અકસ્માત સર્જાયો હતો. બંધ પડેલી ટ્રક સાથે અન્ય ટ્રક ભટકાતા અકસ્માત સર્જાયા બાદ કલાકો સુધી હાીવે જામની સ્થિતિ સર્જાઈ હતી. ત્રમ ક્રેઈનની મદદથી અકસ્માતગ્રસ્ત ટ્રક ચાર કલાકની જહેમત બાદ હટાવાઈ હતી. અકસ્માતમાં કોઈ જાનહાની થવા પામી નહોતી.
વલસાડ હાઈવે ધરમપુર ચોકડી ઓવરબ્રિજ ઉપર અમદાવાદ-મુંબઈ રોડ ઉપર હજીરાથી પાવડર ભરીને નિકળેલ ટ્રક નં.જીજે 16 એવી 7248 અચાનક બંધ પડી ગઈ હતી. પાવડર નરોલી-સેલવાસ ખાલી કરવા જઈ રહી હતી. પાછળથી ભરૂચથી બ્લિચિંગ પાવડર ભરેલ ટ્રક નં.જીજે 16 એવી 9704 બંધ પડેલી ટ્રક સાથે ધડાકાભેર ભટકાતા અકસ્માત સર્જાયો હતો. અકસ્માત બાદ ટ્રાફિક પોલીસે ત્રણ ક્રેઈનની મદદથી અકસ્માત ગ્રસ્ત ટ્રકને ચાર કલાકની જહેમત બાદ હટાવી રોડ ખુલ્લો કર્યો હતો તે દરમિયાન હાઈવે ઉપર બે થી ત્રણ કિલોમીટર ટ્રાફિક જામ સર્જાયોહતો.