નવા વીજ જોડાણથી લઈ વીજ બિલ સુધીની ચુકવણીની થનારી વ્યવસ્થાઃ મોટી સંખ્યામાં લાભ લેવા ગ્રામજનોને કરાયેલી અપીલ
(વર્તમાન પ્રવાહ ન્યુઝ નેટવર્ક)
દમણ, તા.02 : આગામી તા.4 ઓક્ટોબરના બુધવારના રોજ દમણવાડા ગ્રામ પંચાયત ખાતે‘ટોરેન્ટ પાવર આપણાં દ્વારે’ કાર્યક્રમનું આયોજન કરવામાં આવેલ છે.
દાદરા નગર હવેલી અને દમણ-દીવ પાવર ડિસ્ટ્રીબ્યુશન કોર્પોરેશન લિમિટેડ દ્વારા આગામી બુધવારે દમણવાડા ગ્રામ પંચાયતના કાર્યાલય ખાતે નવું વીજ જોડાણ/નામ બદલી/વીજભાર વધારવા/ઘટાડવા માટેની અરજીઓનો સ્વીકાર કરાશે. તદ્ઉપરાંત વીજ સંબંધિત જાણકારી, વીજબિલની ચુકવણી પણ વ્યવસ્થા રાખવામાં આવશે. આ કાર્યક્રમમાં ડિજિટલ પેમેન્ટ પ્લેટફોર્મ/વીજ સલામતિ, વીજ બચત વગેરે ઉપર રાખવાની જાગૃતિની બાબતમાં પણ માર્ગદર્શન આપવામાં આવશે. ટોરેન્ટ પાવરની ફરિયાદ નિવારણ પ્રક્રિયા તથા 24×7 હેલ્પ લાઈન નંબર વિશે પણ જાગૃત કરવામાં આવશે. આ કાર્યક્રમમાં મોબાઈલ એપ્લીકેશન અને તેના ઉપયોગ અંગે પણ ગ્રાહકોને માર્ગદર્શન આપવામાં આવશે.
દમણવાડા ગ્રામ પંચાયત કાર્યાલય ખાતે આયોજીત શિબિરમાં વધુમાં વધુ લોકોને ભાગ લેવા ગ્રામ પંચાયત અને ટોરેન્ટ પાવરે અપીલ કરી છે. આ પ્રકારના કાર્યક્રમો દમણ જિલ્લાની દરેક પંચાયતોમાં થઈ રહ્યા હોવાની પણ જાણકારી આપવામાં આવી છે.