આધારકાર્ડ પાનકાર્ડ અને ફોટાઓ મળી આવતા યુપીનો હોવાની ઓળખ થઈ
શરીરે ઈજાના નિશાનો અને ઘટના સ્થળે લોહીના ડાઘાઓ જોતા શંકાસ્પદ મોત હોવાની આશંકા
(વર્તમાન પ્રવાહ ન્યુઝ નેટવર્ક)
પારડી, તા.03: પારડી તાલુકાના કિકરલા પરિવાર ખાતે આવેલ સીયાર ખાડીના ગરનાળાના પાણીમાં પડેલ એક પુરુષની લાશ ગામના જ રહેવાસી મનીષભાઈ નામના વ્યક્તિએ જોતા તેમણે ગામના સરપંચ મનોજભાઈ પટેલને આ અંગેની જાણ કરાતા સરપંચ મનોજભાઈ તાત્કાલિક ઘટના સ્થળે દોડી જઈ પારડી પોલીસને આ અંગેની જાણ કરી હતી.
પારડી પોલીસે ગરનાળામાં પડેલી લાશ બહાર કાઢી લાશ સાથેની થેલીમાં જોતા થેલીમાંથી આધાર કાર્ડ, પાન કાર્ડ તથા ફોટાઓ મળી આવતા આ વૃદ્ધ મઠયાઇ, બમહોરી, ક્લાન ચરખાડી સ્ટેટ મહોબા યુપીનો રહેવાસી હોવાની ઓળખ થઈ હતી, સાથે સાથે આ વૃદ્ધનો છોકરો દમણ ખાતે કામ કરી ઉદવાડા ગામ ખાતે રહેતો હોય પારડી પોલીસે તેને જાણ કરી બોલાવ્યો હતો. અને લાશને પી.એમ. માટે ઓરવાડ પી.એચ.સી. ખાતે લઈજવામાં આવી હતી.
ઘટના સ્થળે જોવા મળતા લોહીના ડાઘાઓ તથા શરીરે થયેલ ઈજાના નિશાનો જોતા શંકાસ્પદ મોત હોવાની આશંકા થઈ રહી છે. પી.એમ. રિપોર્ટ અને પોલીસ તપાસ બાદ જ સત્ય બહાર આવશે.
