આજુબાજુમાં રહેઠાણ વિસ્તાર હોવાથી આગની વધુ દહેશત ફેલાઈ
(વર્તમાન પ્રવાહ વાપી બ્યુરો)
વાપી, તા.15: વાપી ડુંગરી ફળીયા વિસ્તારમાં વધુ એકવાર ભંગારના ગોડાઉનોમાં આગલાગતા સમગ્ર વિસ્તારમાં અફરા તફરીનો માહોલ છવાઈ ગયો હતો.
ડુંગરી ફળીયા વિસ્તારમાં ગેરકાયદે ભંગારના ગોડાઉનો ધમધમી રહ્યા છે. તેવા ગોડાઉનોમાં સતત આગ લાગવાના બનાવો લગાતાર બનતા રહે છે. તેવો વધુ એક બનાવ શનિવારે સાંજના બન્યો હતો. એક ભંગારના ગોડાઉનમાં અચાનક ભિષણ આગ લાગી હતી. આગનો ફેલાવો એટલો વિસ્તૃત હતો કે આજુબાજુના અન્ય ત્રણ ગોડાઉનો પણ આગની લપેટમાં આવી ગયા હતા તેથી ભયાનક દૃશ્યો સર્જાયા હતા. આજુબાજુમાં રહેઠાણ વિસ્તાર હોવાથી લોકો પોતાના ઘરોમાંથી બહાર દોડી આવ્યા હતા. આગથી જે જગ્યાએ દહેશતનો માહોલ છવાયો હતો તે લોકોના જીવ પડીકે બંધાયા હતા. ઘટનાની જાણ બાદ ચાર જેટલા ફાયર ફાયટરો ઘટના સ્થળે દોડીને આગ બુઝાવવાની કવાયત હાથ ધરી હતી. સતત બે કલાકની જહેમત બાદ આગ પર કાબુ કરાયો હતો. આગમાં કોઈ જાનહાની થવા પામી નહોતી. આગનું કારણ અકબંધ છે. રહેઠાણ વિસ્તારમાં ગોડાઉનો કોઈવાર ખતરનાક બની શકે છે.
