ચીખલીતાલુકામાં પાંજરાની અછત સર્જાતા વનવવિભાગ દ્વારા
વાંસદા તાલુકામાંથી પાંજરા મંગાવા પડયા
(વર્તમાન પ્રવાહ ન્યુઝ નેટવર્ક)
ચીખલી,(વંકાલ), તા.20: ચીખલી તાલુકાના ગામોમાં દિવસેને દિવસે દીપડાના ભયનો માહોલ વધતો જોવા મળી રહ્યો છે. ગતરોજ ફડવેલમાં પણ બચ્ચા સાથે દીપડી નજરે પડી હતી. ચીખલી તાલુકામાં પાંજરાની અછત સર્જાતા વન વિભાગ દ્વારા બે જેટલા પાંજરા વાંસદાથી મંગાવાયા હતા. જોકે એક પણ પાંજરામાં કયાંય દીપડો ન પૂરાતા ગામેગામ ફરતા દીપડાઓ તાલુકાને વહેલો છોડે તેમ લાગતું નથી.
સાદકપોરમાં એક જ રાતમાં માનવી અને પશુ પર દીપડાના હુમલા બાદ ફડવેલના નવા ફળિયામાં પણ ઘરે જઈ રહેલ વીજ કંપનીના કર્મચારીની મોટરસાયકલ સામે પણ દીપડો ધસી આવ્યો હતો. આ ઉપરાંત પીપલગભણ, ખુડવેલ, દેગામ, સાદડવેલ, તલાવચોરા સહિતના ગામોમાં પણ દીપડાઓ જાહેરમાં આટાફેરા કરતા વન વિભાગ દ્વારા પાંજરા ગોઠવી તેમાં મારણ પણ મૂકવામાં આવી રહ્યા છે. કેટલીક જગ્યાએ તો કેમેરા પણ ગોઠવાયા છે. પરંતુ એક પણ દીપડો પાંજરે પુરાયો નથી.
આ દરમ્યાન ગતરાત્રે સાદકપોરના ચાડીયા ફળીયામાં દિલીપ શંકરભાઈના ઘરેથી દીપડો બકરું ઉઠાવી ગયો હતો. અને આ વિસ્તારમાં જ દીપડો જોવા પણ મળતા ગામના સરપંચ સંજયભાઈપટેલે વન વિભાગને જાણ કરી હતી અને સાદકપોરના ધડુલી ફળીયા વિસ્તારમાં વનવિભાગ દ્વારા પાંજરું ગોઠવવાની કવાયત હાથ ધરાઈ હતી. આ ઉપરાંત ફડવેલના નવા ફળીયામાં પણ રાત્રે ત્રણેક બચ્ચા સાથે દીપડો નજરે પડતા તાલુકા સભ્ય મહેશભાઈ, પૂર્વ સરપંચ હરીશભાઈ સહિતનાઓએ વનવિભાગને અવગત કર્યું હતું. તાલુકાના અનેક ગામોને દીપડાઓએ રીતસરના બાનમાં લીધા હોય તેવો ઘાટ સર્જાયો છે.