(વર્તમાન પ્રવાહ ન્યુઝ નેટવર્ક)
ચીખલી(વંકાલ),તા.09:ચાલું વર્ષે ચોમાસામાં ધોધમાર વરસાદ પડતાં ચીખલી પંચાયત (મા×મ) પેટા વિભાગ હસ્તકના મોટા પાયે રસ્તાઓ બિસ્માર બની ગયા હતા. આ રસ્તાઓ ઉપર વરસાદી પાણીના નિકાલનાં અભાવે લાખો રૂપિયાના રસ્તાને મોટું નુકસાન થયું હતું. ભર ચોમાસે રસ્તાઓ બિસ્માર સહિત ઉંડા ખાડાઓ પડી જતાં લોકોને ભારે હાલાકી ભોગવવી પડી હતી જેને લઈને ચીખલી માર્ગ અને મકાન પંચાયત વિભાગ દ્વારા અલગ – અલગ ડિવિઝનોમાં યુદ્ધના ધોરણે રસ્તાઓ સમારકામ સહિત નવીનીકરણની કામગીરી કરવામાં આવી હતી. ચીખલી માર્ગ મકાન પંચાયત વિભાગે નુકસાનગ્રસ્ત 80 કિ.મી. તેમજ નવીનકરણ પ0 કિ.મી. જેટલા રસ્તાઓ ઉપર ધ્યાન કેન્દ્રિત કરી આ રસ્તાઓની મરામત તેમજ 25 જેટલા રોડની નવીનીકરણ સાથે પેચવર્ક જેવી કામગીરી સંતોષકારક રીતે પૂર્ણ કરી હતી. ચોમાસાની વિદાય સાથે છેલ્લા કેટલાક દિવસોથી હરકતમાં આવેલા તંત્રએ ચીખલી સહિત ખેરગામ તાલુકામાં અલગ અલગ વિસ્તારોમાં તૂટી ગયેલા મુખ્ય રસ્તાઓની મરામત કરાવી હતી. જેને લઈને સામી દિવાળીએ રસ્તાનું નવીનીકરણ કરાવતા ગામડાના લોકોઅને વાહન ચાલકોને રાહત થવા પામી હતી.