શહેરમાં રખડતા ઢોરો રોડો ઉપર જ્યાં ત્યાં અડીંગો જમાવી રહેતા ટ્રાફિક અને અકસ્માતની સમસ્યા ઉભી કરતા હતા
(વર્તમાન પ્રવાહ વાપી બ્યુરો)
વાપી,તા.09: ગુજરાતભરમાં રખડતા ઢોરોના ત્રાસ માટે ગુજરાત હાઈકોર્ટની ટકોર બાદ વાપી નગરપાલિકા સફાળી જાગી હતી. શહેરમાં રખડતા ઢોરોને પકડવાની કામગીરી હાથ ધરી હતી.
વાપી શહેરમાં કોઈપણ રોડ ઉપરથી પસાર થતા રખડતા ઢોરોનો અડીંગો જમાવીને રોડ ઉપર બેસેલાના દૃશ્યો સામાન્ય બની રહ્યા છે. આ ઢોરો ટ્રાફિકની સમસ્યા માટે નડતર રૂપ તો છે જ સાથે સાથે કોઈવાર અકસ્માત પણ સર્જતા રહે છે. ગુજરાત હાઈકોર્ટની ચિમકી બાદ વાપી પાલિકાએ ગતરોજ શહેરમાં રખડતા રહેલા ઢોરોને પકડવાની કવાયત હાથ ધરી હતી. પરિણામે વાહન ચાલકો માટે આ રાહતના સમાચાર છે. રખડતા ઢોરની સમસ્યા હાઈવે બલીઠાના બન્ને સર્વિસ રોડ ઉપર રોજીંદી બની રહી છે. બલીઠામાં રહેતા માલધારીઓ તેમના ઢોર સવાર-સાંજ છૂટી મુકી દે છે. પરિણામે રોજ ટ્રાફિક સમસ્યા ઉભી કરી રહ્યા છે તેનો ઉકેલ પણ જરૂરી છે.
