ડેંગ્યુના દર્દીને જરૂરી એવા પ્લેટલેટ બ્લડની અછત ઉભી થઈ રહી છે
(વર્તમાન પ્રવાહ વાપી બ્યુરો)
વાપી, તા.24: સમગ્ર વલસાડ જિલ્લામાં ડેંગ્યુનો પ્રકોશ જોવા મળી રહ્યો છે. છેલ્લાત્રણ મહિનાથી ડેંગ્યુના દર્દીઓનો સતત વધારો થઈ રહ્યો છે. હાલમાં જિલ્લામાં 77 દર્દી પોઝિટીવ જણાયા છે. તેમજ 1019 શંકાસ્પદ કેસ નોંધાયા છે. બીજી તરફ ડેંગ્યુના દર્દીને જરૂરી એવા બ્લડની અછત ઉભી થઈ ચૂકી છે.
ડેંગ્યુ શુધ્ધ પાણીના મચ્છરોથી ફેલાતો રોગ છે. તેથી શહેરી વિસ્તારમાં વધારે પ્રમાણમાં ફેલાઈ રહ્યો છે. જિલ્લાના તાલુકાની વર્તમાન સ્થિતિ મુજબ વાપી તાલુકામાં 230 શંકાસ્પદ કેસની સામે 19 કન્ફર્મ કેસ સામે આવ્યા છે. તે રીતે ઉમરગામ તાલુકામાં 237 સામે 25 કેસ કન્ફર્મ નોંધાયા છે. સૌથી ઓછા ધરમપુર તાલુકામાં એકમાત્ર કેસ છે. કપરાડામાં 67 શંકાસ્પદ સામે 7 કેસ પોઝિટીવ નોંધાયા છે. ડેંગ્યુના દર્દીની સારવાર માટે પ્લેટલેટ બ્લડની ખાસ જરૂરીયાત છે. હાલમાં વેકેશનમાં બ્લડ ડોનર બહારગામ હોવાથી આ રક્તની અછત ઉભી થઈ ચૂકી છે. તેમ છતાં ત્રણ માસમાં બ્લડ બેંકો દ્વારા 4638 યુનિટ બ્લડ વિતરણ કરવામાં આવ્યું છે. તેમાં 106 યુનિટ પ્લેટલેટ બ્લડ પુરુ પાડવામાં આવ્યું છે. હાલ જિલ્લામાં આરોગ્ય વિભાગની 692 ટીમો કાર્યરત છે. જેમાં પાવડરનો છંટકાવ તેમજ સંગ્રહિત પાણીમાં ગપ્પી ફીશ મુકવામાં આવી રહી છે તેમજ આરોગ્યની ટીમો તપાસ કરાવવા નાગરિકોને સમજાવી રહી છે.