(વર્તમાન પ્રવાહ ન્યુઝ નેટવર્ક)
ચીખલી(વંકાલ), તા.03: ચીખલી તાલુકામાં છેલ્લા ઘણા સમયથી અનેક ગામોમાં દીપડાઓ બેફિકર ફરી રહ્યા છે. અને ખાસ કરીને રાત્રી દરમ્યાન લોકોને ગમે ત્યાં દીપડા, બચ્ચા સાથેનો દીપડાના પરિવારનો ભેટો થઈ જતો હોય છે. અને પશુઓ પર હુમલાના બનાવો પણ અવાર નવાર બનતા હોય છે.
આ દરમ્યાન ગતરાત્રે પીપલગભણ અને સોલધરા ગામની સીમમાં અંબામાતાના મંદિર નજીકના એસ.પી. નગર વિસ્તારમાં દીપડાનું બચ્ચું જોવા મળતા કોઈ પણ જાતની ગંભીરતા ન દાખવી કેટલાક સ્થાનિકો દ્વારા તેને ઊંચકી કબ્જો લઈ વન વિભાગને સોંપી દીધું હતું.
હકીકતમાં પોતાનું બચ્ચું વિખૂટું પડે અને ન મળે તેવા સંજોગોમાં તેની માતા દીપડી બેબાકળી બની એકદમ અગ્રેસીવ થઈ વિફરી પણ શકે અને તેવામાં જાનહાની પણ થઈ શકે. ઉપરોક્ત બાબતને વનવિભાગ દ્વારા ગંભીરતાથી લઈ અગમચેતીના ભાગરૂપે તાત્કાલિક અસરથી આરએફઓ આકાશભાઈપડશાલાની સૂચનાથી ફોરેસ્ટર હેતલબેન સહિતના સ્ટાફ દ્વારા સ્થાનિકો દ્વારા જ્યાંથી બચ્ચુંને ઊંચકવામાં અવાયું હતું. તે સ્થળે સલામત રીતે છોડી દેવામાં આવ્યું હતું.