(વર્તમાન પ્રવાહ ન્યુઝ નેટવર્ક)
સેલવાસ, તા.05: દાદરા નગર હવેલી પ્રશાસન દ્વારા સમય સમય પર ફાયર સેફટીને ધ્યાનમાં લઈ પ્રદેશની વિવિધ શૈક્ષણિક સંસ્થાઓમાં ફાયર સેફટી જાગૃતતા કાર્યક્રમ રાખવામાં આવે છે. જે સંદર્ભે ટોકરખાડા હાઈસ્કૂલ પરિસર ખાતે ફાયરસેફટી જાગૃતતા કાર્યક્રમ રાખવામાં આવ્યો હતો. જેમા વિવિધ ટીમો જેવી કે ફાયર ફાઈટર ટીમ, મીડિયા ટીમ, ફાયર અલાર્મ ટીમ, બચાવ ટીમ, રેસ્કયુ ટીમ બનાવીને આગ લાગવાની ઘટનામાં કેવી રીતે કામગીરી કરવામાં આવે છે એની સમજ આપવામાં આવી હતી.
આ મોકડ્રિલમાં શાળા દ્વારા આગ લાગવાની ઘટનાની જાણ ફાયર વિભાગને કરવામાં આવી હતી. ફાયર વિભાગને જાણ થતા જ ફાયર સ્ટેશનથી શાળામાં પહોંચી હતી. ફાયરની ટીમ ઘટના સ્થળે પહોંચીને આગ ઓલવવાનુ કામ કર્યું હતુ. એ સાથે જ આગમાં ફસાયેલા લોકોને બચાવવાનુ, શાળામાંથી બહાર કાઢીને એસેમ્બલી સ્થળ સુધી લાવવાનુ કાર્ય કરવામાં આવ્યુ હતુ. અને ઘાયલોને ત્વરિત એમ્બ્યુલન્સના માધ્યમથી હોસ્પિટલ પહોંચાડીને સારવાર પણ આપવામાં આવી હતી. આ મોકડ્રિલમાં શાળાના સ્ટાફ, શિક્ષકો અને ફાયર વિભાગે ખૂબ સારી રીતે ભાગ લઈને મોકડ્રિલને સફળ બનાવી હતી.