અભયમની ટીમ આવતા પરસ્ત્રીએ બાલ્કનીમાંથી ભાગવાનો પ્રયાસ કર્યો પણ ૧૮૧ ટીમે બચાવી લીધી
પતિ અને પરિણીત પ્રેમિકા પણ બે-બે સંતાન ધરાવતા હોવાથી કાયદાકીય સમજ આપી સમાધાન થયું
(વર્તમાન પ્રવાહ ન્યુઝ નેટવર્ક)
વલસાડ, તા.20: વલસાડ તાલુકાના એક ગામમાં રહેતા બે સંતાનના પિતાને પરસ્ત્રી સાથે સંબંધ હોવાથી પત્નીને મારઝૂડ કરતો હતો. જેથી પીડિતા મોટા દીકરાને લઈ જ્યાં નોકરી કરતી હતી ત્યાં રહેવા ગઈ હતી. જ્યારે નાનો દીકરો પતિ સાથે રહેતો હતો. પત્નીની ઘેર હાજરીમાં પતિ પરસ્ત્રીને ઘરે લઈ આવ્યો હતો અને નાના દીકરાને ફોઈના ઘરે રહેવા જણાવ્યું હતું. જેની જાણ પત્નીને થતા તે રાત્રે ઘરે આવી પહોંચી હતી. તેને જાણ થઈ કે ઘરમાં પતિ અન્ય સ્ત્રી સાથે છે. જેથી બહારથી દરવાજો બંધ કરી અભયમ હેલ્પલાઈન નં. ૧૮૧ પર ફોન કરી મદદ માંગી હતી. જેથી ૧૮૧ અભયમ ટીમના કાઉન્સેલર કંચન ટંડેલ અને વુમન પોલીસ કોન્સ્ટેબલ જાગૃતિ પટેલ ઘટના સ્થળે પહોંચી ગયા હતા. અભયમ ટીમ આવી હોવાની જાણ થતા પરસ્ત્રીએ દરવાજો ખોલવાનો પ્રયાસ કર્યો પરંતુ બહારથી બંધ હોવાથી બાલ્કનીમાંથી ભાગવાની કોશિશ કરી હતી પરંતુ અભયમની ટીમે પકડી લીધી હતી. બાદમાં પૂછપરછ કરતા જાણવા મળ્યું કે, પતિની પરિણીત પ્રેમિકા બે સંતાનની માતા છે. અભયમની ટીમે અનૈતિક સંબંધ ધરાવતી બે સંતાનની માતા અને બે સંતાનના પતિ બંનેનું અસરકારક કાઉન્સેલિંગ કરતા તેઓએ પોતાની ભૂલ સ્વીકારી હતી અને હવે પછી આવી ભૂલ ન થાય તેની ખાતરી આપી હતી. ૧૮૧ અભયમની ટીમે બંને પક્ષને પોતાના બાળકોનો વિચાર કરી પરિવાર સાથે સારી રીતે રહેવા માટે જણાવ્યું હતું. પીડિતાના કહેવાથી બંને પક્ષે કાયદાકીય માહિતી આપી સમાધાન કરવામાં આવ્યું હતું. સાથે અભયમની ટીમે પીડિત મહિલાને જણાવ્યું કે, પોતાના ઘરે રહેવા માટે હવે પછી કોઈ તકલીફ પડે તો ૧૮૧ અભયમની ટીમ મદદ માટે તત્પર રહેશે એવો વિશ્વાસ અપાવ્યો હતો.