જિલ્લાની 382 ગ્રામ પંચાયતના 150 તલાટી હડતાળ પર છે : ઓફીસની ચાવીઓ મામલતદારોને સોંપી
(વર્તમાન પ્રવાહ વાપી બ્યુરો)
વાપી, તા.03
સમગ્ર ગુજરાતમાં તલાટીઓના પડતર પ્રશ્નો છેલ્લા ચાર વર્ષથી માંગણીઓ છતાં નહી સંતોષવામાં આવતા અંતે ગુજરાત તલાટી મહામંડળ દ્વારા જાહેર કરાયેલ એલાન મુજબ તા.02 જુલાઈથી તલાટીઓની અચોક્કસ મુદતની હડતાળ પર ઉતરી ગયા છે. આજે હડતાળના બીજા દિવસે પણ વલસાડ જિલ્લાના તમામ તલાટીઓ કામકાજથી અળગા રહેતા હજારો અરજદારોના કામકાજ અટકી જતા મુશ્કેલી બેવડાઈ રહી છે.
વલસાડ જિલ્લાની 382 ગ્રામ પંચાયતોમાં 150 ઉપરાંત તલાટી/મંત્રી ની ફરજ બજાવી રહ્યા છે. આ તમામ તલાટીઓની હડતાળઉપરનો આજે બુધવારે બીજો દિવસ પણ યથાવત રહ્યો હતો. ડી.ડી.ઓ. અને મામલતદારોને પોતાની ઓફીસની ચાવીઓ તલાટીઓએ જમા કરાવી હડતાળ વધુ વેગીલી બનાવી દીધી હતી. તેથી જિલ્લાના હજારો અરજદારોના કામકાજ હાલમાં અટવાઈ ચૂક્યા છે. સરકાર કોઈ ઉકેલ નહી લાવે તો અંતે વેઠવાનું પ્રજાને જ છે. લોકોમાં હડતાળની મોટી નારાજગી જોવા મળી રહી છે.