(વર્તમાન પ્રવાહ ન્યુઝ નેટવર્ક)
વલસાડ, તા.11: વલસાડ જિલ્લા યુવા વિકાસ અધિકારી, જિલ્લા રમત ગમત કચેરી અને ધરમપુર નગરપાલિકા દ્વારા ‘‘મેરી માટી મેરા દેશ” સાંસ્કૃતિક કાર્યક્રમ અંતર્ગત નગરપાલિકા કક્ષા કાર્યક્રમનું આયોજન ધરમપુરમાં કુશળ કુંવરબા, અમૃત સરોવર(તળાવ) ખાતે શુક્રવારે સવારે 10:00 કલાકે કરવામાં આવ્યું હતું.
આ કાર્યક્રમમાં વલસાડ જિલ્લા સંગઠન પ્રમુખ હેમંતભાઈ કંસારા, ધારાસભ્ય અરવિંદભાઈ પટેલ, ધરમપુર તાલુકા પંચાયત પ્રમુખ રમીલાબેન તથા અન્ય હોદ્દેદારો, ધરમપુર નગરપાલિકા ચીફ ઓફિસર વિજયભાઈ ઈટાલીયા, જિલ્લા યુવા વિકાસ અધિકારી હિમાલી એમ.જોષી હાજર રહ્યા હતા. આ કાર્યક્રમમાં સ્વાગત ગીત તેમજ મહેમાનોનું પુષ્પગુચ્છથી સ્વાગત કરવામાં આવ્યું હતું. આ કાર્યક્રમમાં શીલા ફલકમ કાર્યક્રમ, વૃક્ષારોપણ કાર્યક્રમ, દેશભક્તિ ગીત, મેરી માટી મેરા દેશ થીમ નૃત્ય તેમજ આદિવાસી નૃત્ય જેવા સાંસ્કળતિક કાર્યક્રમોએ રમઝટ જમાવી હતી. જેમાં બહોળી સંખ્યામાં જન સંખ્યા ઉપસ્થિત રહી હતી. આ કાર્યક્રમમાં પંચ પ્રાણ પ્રતિજ્ઞા પ્રકાશિત દિવડાઓ સાથે લેવામાં આવી હતી. હેતલબેન પરમારે આભારવિધિ કરી હતી.
