(વર્તમાન પ્રવાહ ન્યુઝ નેટવર્ક)
પારડી, તા.28: અંગ્રેજી કેલેન્ડરનું નવું વર્ષ એટલે કે થર્ટી ફર્સ્ટની ઉજવણી દારૂની પાર્ટી કરીને ઉજવવાની એક પ્રથા બની ગઈ છે. દારૂ પ્રતિબંધિત એવા ગુજરાતમાં રહેતા દારૂ રશિયાઓ પણ કેન્દ્ર શાસિત રાજ્ય દમણ કે સેલવાસમાં આવી ચિક્કાર દારૂ પી ને ગુજરાતમાં પ્રવેશતા હોય છે ત્યારે આ વર્ષે થર્ટી ફર્સ્ટ પહેલાથી જ પારડી પોલીસ દ્વારા પણ આવાપિધ્ધરોને ઝભ્ભે કરવા તમામ તૈયારીઓ કરી દેવામાં આવી છે.
સૌ પ્રથમ તો કેન્દ્ર શાસિત પ્રદેશની તમામ ચેકપોસ્ટો શીલ કરી દઈ સઘન ચેકિંગ હાથ ધરવામાં આવી રહ્યું છે ફોર વ્હિકલ હોય કે ટુ વ્હિકલ દરેક ગાડીઓને ચેકપોસ્ટ પર ચેક કર્યા બાદ જ ગુજરાતમાં પ્રવેશ આપવામાં આવી રહ્યો છે જ્યારે 31 ડિસેમ્બરના દિવસે અને રાત્રે આવા પિધ્ધરોને ચેક કરવા માટે બ્રેથલાઈઝર અને પોલીસ સ્ટેશન લાવવા માટે સાધનોની વ્યવસ્થા પણ કરવામાં આવી છે.
આ વર્ષે ખાસ આયોજનમાં પોલીસ સ્ટેશન ખાતે જ મેડિકલની ટીમ પણ રાખવામાં આવશે જેથી આવા તમામ ધરપકડ થયેલા પિધ્ધરોને પોલીસ સ્ટેશન ખાતે જ મેડિકલ ચેકઅપ કરી શકાય.
સાથે સાથે ફક્ત કેન્દ્ર શાસિત પ્રદેશોની ચેક્પોસ્ટ પર જ ચેકિંગ હાથ ધરવામાં આવશે એવું નથી પરંતુ ગુજરાતમાં દરેક વાડી, ફાર્મહાઉસ કે પછી ભાડેથી આપવામાં આવતા ઘરોમાં પણ સરપ્રાઈઝ ચેકિંગ કરવામાં આવશે અને જો શંકાસ્પદ જણાશે તો વાડી અથવા ફાર્મ હાઉસમાં પોલીસ રેડ કરી આવા દારૂની મહેફીલ માણતા તમામ પિધ્ધરોની ધરપકડ કરવામાં આવશે આમ આ વખતે થર્ટી ફર્સ્ટને લઈ તમામ તૈયારીઓ પોલીસ દ્વારા કરી દેવામાં આવી છે.
