છરવાડામાં રહેતો અંકુર પટેલ કામથી બુલેટ લઈ ઘરે પરત ફરી રહ્યો હતો ત્યારે અકસ્માત સર્જાયો
(વર્તમાન પ્રવાહ વાપી બ્યુરો)
વાપી, તા.09: વલસાડ લીલાપોર કોસ્ટલ હાઈવે ઉપર સોમવારે સાંજે બુલેટ રસ્તા વચ્ચે આવી ગયેલ ગાય સાથે ભટકાતા અકસ્માત સર્જાયો હતો. અકસ્માતમાં ગાયનું ઘટના સ્થળે જ મોત થયું હતું. જ્યારે બુલેટ ચાલક યુવાન ઘાયલ થતા સારવાર માટે ખાનગી હોસ્પિટલમાં ખસેડાયો હતો.
વલસાડ લીલાપોર કોસ્ટલ હાઈવે ઉપર ગતરોજ સાંજે છરવાડામાં રહેતો અંકુર પટેલ તેની બુલેટ નં.જીજે 15 બીએચ 4356 લઈને રાબેતા મુજબ કામ પરથી ઘર તરફ જઈ રહ્યો હતો તે દરમિયાન રસ્તા ઉપર અચાનક ગાય દોડી આવતા બુલેટ ગાય સાથે ભટકાતા અકસ્માત સર્જાયો હતો. અકસ્માતમાં ગાયનું ઘટના સ્થળે મોત થયું હતું. અકસ્માત બાદ એકઠા થયેલ લોકોએ 1962 કરુણ એમ્બ્યુલન્સને જાણ કરતા એમ્બ્યુલન્સ ઘટના સ્થળે આવી ગાયને તપાસી મૃત જાહેર કરી હતી. ઘાયલ નિકુંજ પટેલને ખાનગી હોસ્પિટલમાં સારવાર માટે ખસેડયો હતો. લોકોએ જે.સી.બી. બોલાવી ગાયને ઉંચકીને દફનવિધી આટોપી હતી.
